文/稀思路
丙午馬年到來，筆者先恭祝各位讀者，一馬當先、馬到功成、馬上行運。過去幾日，雖然正值農曆新年假期，大新聞比較少，不過祖國嘅春晚表演，就一如往年驚艷世界，喺上年春晚表演仲係做出簡單動作嘅機器人，今年已經識得打功夫，而且係一批機器人同時做出高難度動作，令世界再度為中國科技震驚。中國發展一日千里，更重要嘅係，喺紛亂嘅國際形勢當中，即使世界艱難，中國依舊給予世界確定性，照舊向前行。
筆者一向比較關注國際形勢、海外移民，過去嘅乙巳蛇年，的確係十分不容易嘅一年，除咗俄烏衝突持續、加沙戰爭似停未停、美伊局勢不穩，全球嘅一大動亂來源，竟然係曾被稱為「世界警察」嘅美國。特朗普再次上任為美國總統，一下子就將地球帶回叢林法則，對住其他國家玩「誰大誰惡誰正確」呢一套。
其實，喺特朗普未再上任前，全球經濟已經出現疲態，點知特朗普依然「美國優先」，一上任就同時對世界各國開打關稅戰，本身關係唔好嘅要加關稅，本身係盟友都要加關稅。環看全球，基本上就得中國頑抗到底，特朗普本來想玩極限施壓，但中國經過特朗普第一次上任後嘅經驗，今次有晒準備，最後特朗普亦只能夠「縮」，再次證明中國不惹事，但亦不怕事！
睇返祖國情況，過去一年亦係「十四五」規劃圓滿收官，喺複雜嘅內外環境之下，國家完成咗各種目標任務，進一步全面深化改革，展現出強大韌性同活力。細數不同大事件，有中共二十屆四中全會勝利召開、紀念中國人民抗日戰爭暨世界反法西斯戰爭勝利80周年、設立台灣光復紀念日、慶祝西藏自治區成立60周年、慶祝新疆維吾爾自治區成立70周年，以及喺粵港澳三地聯合舉辦第十五屆全國運動會等等。
喺剛過去蛇年，除咗美國製造混亂、中國依舊發展，筆者覺得特別重要一點，係在於因為美國倒行逆施，世界各國都開始唔再信任美國，開始加強同中國嘅交往，法國、英國等國家領袖相繼出訪中國，唔同國家都開始減少對美國嘅依賴；加上美國一時強攻委內瑞拉，一時又話要搶格陵蘭島，令自己變得不再可信，唔同國家領袖要搵一個可靠嘅大國合作，中國亦成為咗最佳選擇。
即使世界再艱難，中國一樣照行，中國唔係靠侵略、唔係靠威嚇，而係以合作、互惠以及共贏，一直向前行，給予其他合作國家安全感。展望丙午馬年，世界可能仍然會亂，仍然會有美西方國家展露霸權本色，但筆者堅信，時間會站喺正義一邊，得道自然多助，失道必然寡助。今年係「十五五」規劃開局之年，國家已經開始新一輪嘅重大規劃，香港各界，又準備好未呢？
收藏
取消收藏
分享
