【點新聞報道】農曆春節將至，利是金額再度成為網路熱議話題。有網民發文嫌棄同事封20元利是，「其實2026年啦，派$20蚊利是嗰啲已婚同事，真心不如唔好派」。帖文曝光後，辣㷫不少網民，紛紛鬧樓主無家敎。
該名網民在一個社交平台賬戶匿名投稿，問：「你覺得$20 蚊利是係『好意』定『侮辱』？」樓主直指20元利是太少，如果真係肉赤，不如請大家飲餐茶算數，好過派完被人背後笑孤寒，「其實2026年啦，派$20蚊利是嗰啲已婚同事，真心不如唔好派。講真，今時今日喺香港食個Lunch都$6、70蚊起跳，你畀$20蚊我，我當然多謝你意頭，但轉個頭去買杯廢水都無咗啦」。
樓主更不屑為利是，而做戲拜年，「最難頂係平時大家明明唔熟，你特登行埋嚟派封$20，我要畀番好大嘅情緒價值你，要好興奮咁講『恭喜發財、身體健康』，我覺得我個演技值錢過嗰$20囉。」樓主更建議全港辦公室利是「公價統一$50起跳」。
帖文遭到了大量網民圍剿，「咁你唔好收囉，嫌三嫌四」、「咁你唔好收利是啦，免得比人侮辱」、「嫌少不如唔好逗」、「你啱呀，派20比你呢啲同事，真係應該唔好派留番比乞兒好過」、「其實計較利是有幾錢嘅成年人都廢廢地」、「看完呢篇文字，我要考慮連$20都慳返，入張紅紙寫住『恭喜發財』算了，反正點都有人賺廿蚊少錢。」
有網民認為樓主應該要懂得感恩，「比你係人情、唔比你係道理」、「多與少，都係利利是是」、「利是係意頭，唔係人工，老奉比你，當到你派時就會知道點派，你派10000都得」、「我未婚嘅，但你呢d 真係唔係人來，同事一場賺錢好辛苦，無啦啦派20蚊比你，仲要比你上來唱，你都幾乞人憎」。
有網民坦言不想派利是，「你又明唔明，平時大家明明都唔熟，我都要特登行埋嚟派$20畀你，仲要係打孖上。我都好唔想呀」、「欠Ｘ咗你㗎咩！你估你嗰20蚊演技人哋好Ｘ想睇嘅，平日公司都有唔少大戲睇啦！做乜又要畀錢你。又要比你Ｘ小氣！重點係鬼叫你嫁唔出或者娶唔到，搞到人哋要派利是畀你咩！根本就係你嘅錯！你禁歧視嗰20蚊，不如你新年舉個恭喜發財牌，統一叫人唔使派利是畀你啦！」
有網民亦認為雙方都無謂勉強，「唔鍾意可以唔俾，唔好為咗面子，扮無所謂」、「咁咪唔好派囉，你唔想派，我都唔太希罕收」、「應該連利是封都慳返」、「建議公司同事一律唔派，皆大歡喜」。
收藏
取消收藏
分享
