【點新聞報道】一連兩場的「TWINS 25周年1314新春限定粉絲見面會」昨日（13日）於西沙GO park舉行。這是Twins出道以來首個大型Fans Meeting，別具意義。向來疼惜Twins的經理人霍汶希（Mani）當然到場支持，開show前，湯怡（Kathy）驚喜現身，送上祝賀二人25周年蛋糕。場內亦展出了8套二人歷年來的經典舞台服裝及頭飾，讓fans可以近距離打卡。
本次活動MC由Twins好友「農夫」擔任，期間，Twins邊唱邊落台跟fans作超近距離接觸，全場high爆。之後，Twins又跟fans玩估歌仔、寫揮春遊戲。唱完《忠粉》後，台下fans舉牌點歌，Twins寵粉模式全開：「好啦，每首唱少少啦。」
現場播放二人「成長」片段，當看到以前頒獎禮片段時，阿嬌感觸話：「好多回憶呀。」阿Sa笑說：「好搞笑呀，睇返啲頒獎禮嗰啲片，嗰陣時啲鏡頭會拍到你哋㗎嘛，我真係覺得你哋好勁，打鑼打鼓，哈哈。」阿嬌話：「係呀，成場都係你哋把聲。」阿Sa即肉麻表白：「其實全場其他歌手啲fans都好勁，但我覺得你哋真係最勁！令到我哋好有面子啊，哈哈。」
隨後阿Sa指十分喜歡這種形式見面，還趁機叫fans找回當年的熱情：「我覺得呢幾年都弱咗少少囉你哋，哈哈。」阿嬌和應，更着fans「要搵返個Passion」。阿Sa續說：「你哋要保持個初心㗎嘛！好似我哋咁！要保持個能耐、保持個精神。雖然你哋個年紀、我哋都係啦，大家越嚟越大，但係都唔可以『老兀兀』咁樣㗎嘛，我喺台度都唔會嗚⋯⋯咁㗎嘛。」阿Sa最後話：「嗱，以後記住我哋去到邊度都要咁呀，勿忘初心呀。」
臨完場前，二人分享感受。阿嬌先說：「首先好多謝大家一路以嚟咁支持我哋，有一啲25年一直喺度、有啲係新嘅、有啲係中間加入，雖然我哋唔係成日都可以見面，但係我哋都會成日掛住大家，所以希望以後多啲呢啲線下嘅活動，等你哋唔好咁望穿抽水。」隨後更自爆有社恐，太接近人會緊張，「但係今日我冇，呢個場地真係好warm，我今日完全冇怯場、冇緊張、非常好」。而阿Sa坦言出場前十分緊張：「雖然開演唱會都好緊張，但呢個係fans meeting，suppose就係同啲最熟、最friend嘅fans一齊見面，但唔知點解好緊張，可能係好耐冇見，亦都可能係咁樣嘅形式嘅fans meeting真係第一次。平時開演唱會，你哋係好遠，但呢度大家係好close，所以可能因為係咁樣就有少少緊張，所以好多謝大家今日嚟到呢度同我哋一齊玩。」最後二人逐一跟fans說bye，首場見面會溫馨又感人。
（點新聞特約記者陳惠芳報道）
收藏
取消收藏
分享
