文/稀思路
曾幾何時，英國「雄霸」全球一段好長嘅時間，喺唔同地方都展現出不凡嘅軍事同政治技巧，不過喺第一次世界大戰之後，美國就取代咗英國成為世界「超級大國」。一直以來，好多人都話英國人玩政治最叻，最強就係將其他國家玩弄於指掌之中，不過呢招對新中國冇用，筆者近期發覺，英國其實仲有樣嘢玩得叻，就係玩移英港人，因為最近佢哋又推出所謂「新政策」，話BNO持有人喺1997年香港回歸祖國前未滿18歲嘅子女，合資格獨立申請BNO簽證，無須依附父母。依家英國咁嘅環境，呢個究竟係德政，定係「整蠱港人系列」呢？
相關報道引述英國內政大臣聲稱，「英國會永遠履行對香港人的歷史承諾，雖然我們必須恢復邊境秩序和控制（移民），但英國人永遠歡迎真正需要庇護的人」、「自2021年以來，英國已為近17萬港人提供『避風港』，現正擴大簽證資格，讓更多家庭來英建立新生活。」另外英國外相就話「現屆政府仍會堅定不移支持香港人，我們正確保因年齡問題而錯失保護的年輕人，如今能夠獲得保障。」
就咁聽落去，可能以為英國對香港人「好好」，但諗真啲，依家英國咩環境？經濟差、失業多，而且治安唔好，筆者日前同朋友食飯，英國返嚟嘅朋友就同筆者講英國部分地方，就算係大城市治安都好差，好多搶手機嘅罪案，如果有戴名錶仲危險。英國依家又「放寬」更多香港人移民英國係咪好事呢？
至於話英國政府玩香港人，珍珠都冇咁真，事關依家盛傳英國政府改革移民制度，用BNO移民英國嘅港人雖然仲可以住5年再申請永居，但係可能要通過更高嘅英語水平要求同年收入要求，問題就嚟喇，有啲人係過去退休嘅，邊度有所謂某個數以上嘅「年收入」？又或者，有人本身喺香港時英文已經唔好，又點樣突然「大發神威」，達到英國大約等於A-Level嘅英語水平呢？英國政府唔係玩港人，又係咩？
依家英國再放寬BNO計劃，理論上就係Target一班依家30幾至40幾歲嘅香港人，佢哋理論上如果移民，應該係符合到英語同收入要求嘅，但英國係咪值得去，就係另一個問題。至於依家去咗嗰班，基本上就等於上咗賊船，大部分家庭，都好少全部成員符合可能有嘅新要求，如果佢哋攞唔到永居，一係就「永續簽證」，一係可能返香港重新開始，講錯，應該係話「從零開始」先啱。英國政府呢種「一邊扮好人又一邊玩人」嘅做法，真係「絕」。
如果讀者們睇返英國政府提出政策嘅時間線，其實就正正係黎智英案宣判之後，當中嘅政治意味其實遠遠大於實際意味，筆者甚至認為，英國政客包庇黎智英、英國政府「出手」，係對黎智英案件嘅粗暴干預。換個角度，如果黎智英喺英國，勾結外國勢力而損害英國利益，肯定黎智英都會受懲治，因為英國都有自己嘅國家安全法律。場景換成係香港，英國就好似「抽水任抽」咁干預，但呢個世界有樣嘢叫「他朝君體也相同」，正如當年支持香港黑暴嘅英國，之後自己國家嘅反政府示威，都唔係小事呀！
收藏
取消收藏
分享
