文/稀思路
黎智英案終於審結，法庭今日（9日）裁決他判監20年，正義雖然遲到，但始終得到彰顯！對於黎智英案件，外國勢力始終「干預停不了」，過去一段日子，由傳媒、外國政客到黎智英仔女，不斷就黎智英案抹黑法庭同特區政府，當中嘅名目好多，例如「黎智英只係為自由而戰」、「黎智英只係因為政治立場而被控」、「黎智英身體唔好應該放咗佢」等等，試圖將黎智英講成係「自由鬥士」。不過，黎智英唔係咩為自由而戰，而係作為一個亂港分子，佢係「為美國而戰」先啱。
可能因為日子耐咗，開始有人唔記得黎智英喺黑暴時做過啲咩，今日就等稀思路同讀者們回下帶。早喺黎智英開案陳詞時，就已經點出咗黎智英勾結外國勢力嘅部分詳情，例如，喺2019年7月，黎智英喺美國接受訪問時，當時就揚言支持美國透過貿易戰手段同中國談判，仲承認自己見美國官員時，曾經明確促請美國政府「支持」香港，聲稱香港嘅「反抗」係「道德的戰爭」、「香港同美國有相同的價值觀」，宣稱「我們正在前線為美國而戰」、「我們要知道美國就在背後支持我們」，並期望美方有實際行動「支持」香港。
到咗2020年5月，黎智英出席台灣一個網上節目時，被問到外國都關注佢被捕，問佢有冇受外國甚至美國中情局（CIA）影響，黎智英就回應話「我好想CIA、好想美國影響我們、好想外國影響我們」，明言非常需要外國勢力嘅「支持」。之後受訪又提到特朗普，表明期待美國對中國採取嚴厲嘅「制裁」措施等等。事實上，類似嘅說話，黎智英唔止講過一次，請求外國「制裁」中國同香港，根本一直就係黎智英嘅主調。
可能有人會覺得，黎智英嘅行為主要發生喺香港國安法生效前，但各方應該留意法官嘅判詞，判詞清楚提到，黎智英在香港國安法生效前，公開、直接請求外國「制裁」，而喺香港國安法生效後，其實黎智英只係換個形式，隱晦地表達鼓吹外國政府「制裁」香港嘅立場。即係話，黎智英嘅策略係香港國安法生效前，就大張旗鼓乞求外國「制裁」香港，法律生效後佢嘅「請求」就變得隱晦或含蓄少少，但犯罪行為繼續，亦成為咗佢罪成嘅鐵證！
喺黑暴運動時，其實有一點十分清晰，由黑暴運動開始，無論係黎智英以至其他激進派，佢哋煽暴縱暴嘅目的，就係要推倒特區政府，甚至係影響埋中央，但一到咗審判，每一個攬炒派被告（唔認罪嘅），都話自己唔關事、無犯法、無意圖危害國家安全，同自己本身喺黑暴時嘅言行，完全唔一樣。當中，黎智英根本就係黑暴運動最大嘅推手，依家時辰到喇，要找數，要承擔罪責，就想話自己只係因政治立場而被控，有邊個信？黎智英唔單止罪有應得，佢煽動過咁多青年、香港市民去抗爭，其實係罪大惡極至真！
收藏
取消收藏
分享
