文/稀思路
壹傳媒創辦人黎智英經審訊後，被裁定「串謀勾結外國勢力或境外勢力危害國家安全罪」等罪成，連同案件其他被告，將喺2月9日（下周一）判刑。從黎智英被捕至今，基本上外國勢力就冇停止過干預案件，最近黎智英兒子黎崇恩又出動，批評英國首相訪華時「沒有以黎智英獲釋作為條件，就批准中國興建大使館」，筆者想問，英國首相訪華，點解要攞黎智英案脅迫中方？黎智英係「奉旨犯法」，定係「為英國犯法」？
睇新聞報道，黎崇恩嘅論調其實相當「有趣」，佢喺英國國會聽證會，唔止係提出意見，係質疑甚至批評英國首相，大概意思係話英國首相訪華，同中方傾合作前提，係要以「釋放黎智英為條件」，因為佢父親被捕，除咗關乎「人道主義」同國家安全，仲涉及英國嘅價值觀，黎智英作為「捍衛自由的人，應該享有自由」。
以上一段說話，讀者們睇到幾多謬論？筆者就睇到唔少，首先係黎智英被捕，唔係咩人道主義或價值觀問題，而係黎智英嘅行為，危害到香港特區以至國家安全，處理黎智英，最合適方法係由法庭去審訊、裁決。再者，就係黎智英唔係咩捍衛自由，而係煽動市民上街抗爭，而且叫外國「制裁」香港；自由唔係想做咩就做咩，而係喺法律、道德以及唔影響他人嘅情況之下，行使合法、合乎道德嘅自由，黎崇恩應該搞清楚當中概念。
黎智英兒子黎崇恩、女兒黎采近幾個月，四出喺外國要求外國政府干預黎智英案，黎崇恩喺英國國會質疑英國政府前，黎采就去過美國同眾議院前議長佩洛西等會面，各自發力，要求外國幫手施壓，想迫特區政府甚至法庭「放人」；但佢哋愈係咁做，其實大家就會睇得更清楚，黎智英同外國勢力關聯好深，否則，一個普通香港被告，被告家人可以去到外國見咁多官？仲有兩三日黎智英案就判刑，外國愈干預，香港法庭就愈要堅定！
喺黎崇恩喺英國國會投訴英國首相一事，一個唔係好關事嘅議題係，筆者覺得黎崇恩嘅想法有點天真，佢覺得英國去中國，中方要同英國達成合作協議等，英國可以提出任何條件；但黎崇恩有冇搞清楚背景，事實係英國以至歐洲同美國關係唔太好，G7國家輪住訪問中國，係想同中國加大合作，如果英國首相訪華仲要冒犯中國，咁訪華做咩？英國想同時失去兩個大國（中國、美國）？黎崇恩呢類論調，可能反對派支持者覺得合理，但稍為理性嘅人，都可能會覺得佢哋喺度搞事。
如果讀者們有睇相關報道，其實英國末代港督彭定康，思維都係同黎崇恩「咁上下」，彭定康稱「這次訪華唯一的成果是『威士忌』，而不是黎智英」，筆者唔知彭定康思維有幾進步，但佢係咪仲覺得英國係「大英帝國」？英國首相去中國，就係想合作，而且喺法治問題，中方亦唔會退讓。一班要護短黎智英嘅人，將矛頭指向英國政府，但係，英國嘅國家安全法律，其實一樣禁止有人勾結外國勢力損害英國，不論東、西方政制是否一樣，全球各地，對於維護國家安全嘅法律同要求，唔少都係一致嘅，請彭定康等人認清事實！
收藏
取消收藏
分享
