【點新聞報道】宣萱接受陳志雲主持的電台節目訪問，她從電影《尋秦記》、感情觀到演藝生涯的點滴，娓娓道出33年間的浮沉。
《尋秦記》掀起熱潮，宣萱與古天樂（古仔）亦被封為「夢幻CP」，陳志雲問為何她與古天樂「冇可能」？宣萱直言：「識咗30幾年喇，我同佢拍《餐餐有宋家》識嘅，真係冇（愛情）感覺，好似兄弟。」陳志雲反問：「點解唔係姊妹呢？」宣萱笑言：「我覺得我似男仔性格多啲，佢又唔當我女人咁去看待，唔會對我呵護備至。」她形容古天樂是講得出做得到的人，亦十分了解自己：「我有事佢一定會幫我。」
宣萱在《尋秦記》演的烏廷芳，與琴清「共侍一夫」，她說：「烏廷芳係佢仲刁蠻階段，我覺得佢都唔會接受，但經歷咗好多嘢之後，佢都要去接受。25年之後已經係一家人，呢兩個人已經無分邊個係老婆，邊個係媽咪。」現實中的宣萱則直言無法接受開放式關係：「梗係唔得，我唔可以分享。」若真的遇上類似情況，她會選擇退出成全對方。而宣萱曾在不知情下，成為別人感情中的「第三者」，由朋友提醒才得知真相，當下感到非常震驚。對於愛情，她抱隨緣心態：「一個人其實都好OK，最緊要啱。」她自認在感情上保守，從未主動追求異性，但若感情不合，會主動提分手：「唔啱就唔好嘥大家時間。」
談及有份參與電影，宣萱表示當古天樂邀請時，她毫不猶豫答應，她形容這是一代人集體回憶：「《尋秦記》係一個好成功電視劇，係佢（古天樂）嘅代表作，無乜電視劇係可以轉做電影，仲要過咗25年之後，好似跟住大家成長，好似全香港、全世界個個都一齊去行過呢條路，係始創嚟時。」
宣萱透露電影拍下不少未曝光片段，導演團隊正考慮剪輯成另一版本，視乎票房而定。對於古天樂指電影有「第三結局」，宣萱笑言不記得有拍過，當時後期補戲亦未能參與。她更透露拍攝時沒有考慮片酬：「嗰陣時佢哋搵我拍，我完全冇問過（片酬），其實冇都會拍。」
另外，陳志雲重提宣萱1994年與古天樂等一眾演員現身《K-100》挑戰TVB高層，直指公司過於重用歌星拍劇，而歌星又經常遲到，其率直敢言再度成為網民焦點。
陳志雲指當時他亦在場，宣萱聞言笑稱：「好多謝你冇雪我。」並解釋當年發言動機：「有問題發生時候，自己人就會被人鬧，出面人（歌星）就唔會被人鬧。」陳志雲解釋歌手一個騷僅100元，宣萱則強調：「唔關錢事，係職業操守問題。」問及離開TVB原因，宣萱坦言：「好簡單，純粹成個運作方式，我覺得唔舒服。」她解釋以往在工作中認為，只要有實力就會受到欣賞，但世界並非如自己所願，她補充：「我會撇開你個人性格同我夾唔夾，如果你啱做呢樣嘢，我都會揀你去做，我覺得咁樣係公平。」然而當工作需取悅不想取悅之人時，她自問無法做到：「原來可能要擦鞋，要please一啲你唔想please嘅人，咁我問自己得唔得？唔得。」
宣萱強調關係講緣分，「夾唔到」便覺辛苦：「我離開TVB係因為嗰陣時，內部好多轉變，好多人事走咗，有啲新人嚟。以前嗰班係夾嘅，去到唔夾時候，其實會有好多問題發生。我好憑感覺做嘢，我好注重開心，唔開心嘅，走﹗」
（點新聞特約記者陳惠芳報道）
收藏
取消收藏
分享
