【點新聞報道】小巴違法超載！有女網民在社交平台上載一段影片，指一輛通宵小巴客滿後，仍讓4名乘客上車，分別站在上落車位置以及走廊，直斥「認真黐線，好危險」。不少網民看過影片後，都鬧爆離晒譜。
該名女網民在社交平台threads發文指，日前凌晨，乘坐通宵小巴由灣仔前往屯門，班次極為疏落，司機在客滿的情況下，竟讓4名乘客上車，「通宵49s小巴，灣仔去屯門，一個鐘得一班車，滿客仲上多4位… ？」。從其上載的兩段影片可見，當時小巴正在路上行駛中，有兩名男女乘客站在小巴走廊，亦有兩名男女先後站在上落車的位置。樓主直指是危險駕駛，「認真黐線，好危險」、「求神拜佛，要平安返到屋企」。
樓主又分享自身經驗，指明白班次疏落、等車難，惟一旦發生意外，就後悔都莫及，「其實我都試過等呢架車等到灰，凌晨五點等到六點幾都冇車，喺Google Maps顯示每半個鐘一班，初初以為班車delay，或者司機唔夠原因而縮短班次，取消咗班次冇任何通知/顯示，最終等得太攰都係要坐的士返屋企。開個post出嚟，係希望大家留意吓，到時真係發生咗啲咩意外，就後悔都嚟唔切啦」。
帖文引起網民熱議，不少人認為十分離譜，「超載無保險，一個鐘一班擺明係唔夠車可以投訴」、「企位無扣安全帶，4位剛$20,000」、「這架小巴已回到六，七十年代有設企坐」、「等下班會死咩，拎自己條命搏」、「安全定生命重要，我就揀生命」。
不過，亦有網民指通宵巴超載很常見，「其實通宵小巴好多都係咁」、「你有得上車先會咁多嘢講啫，你上唔到嗰陣你就唔係咁多事啦」、「通宵交通係咁㗎啦，有危險知㗎，咪小心啲囉」。
收藏
取消收藏
分享
