文/稀思路
過去大約一年時間，移英港人嘅心情好似坐過山車咁，英國由執政黨到在野黨，不斷放出風聲話要收緊移民政策，然後又話「一場誤會」，始終都會照顧住移英港人。不過，之前英國內政部公布嘅移民改革諮詢，就指出雖然用BNO「5+1」計劃移英嘅港人，仲係等五年就可以申請永久居留，不過可能要通過更高嘅英語要求同收入要求，大部分未符資格嘅移英港人，隨時要返香港。最新消息，就係一班移英港人去搵自己選區嘅議員，結果係相關議員雖然有回應，但就唔肯回應修改移民要求問題，即係點？即係呢班移英港人，可以「準備考英文試」喇。
坦白講，一班移英港人都係醒目嘅，對準英國內相馬曼婷（Shabana Mahmood）選區，寫信、聯署畀馬曼婷，由選民直接向選區議員兼有關官員表達訴求，理應係得到最好嘅效果；但係英國政客「你精我都唔笨」，馬曼婷好快有回覆，但馬曼婷喺信中就冇回應港人約見同訴求，仲重申永居申請人需要符合「適合」、「融入」同「貢獻」等強制要求。
筆者一直都話，英國人以至英國政客講嘢，唔一定直接話NO或者拒絕選民，馬曼婷所講嘅「適合」、「融入」，會唔會係意指如果移英港人英文都唔符合一定水平，又點喺英國長期生活呢？至於「貢獻」，就明顯係講緊工作、賺錢啦。綜合馬曼婷講嘅嘢，意思係如果英文差、冇收入，點解政府會畀港人留喺英國呢？
馬曼婷之所以咁講，除咗佢本身係英國內相，其實就算作為一個選區嘅議員，佢自己都有個政治位要處理，就係要向所有選民交代，而唔係只滿足港人移民群體；成個大勢，係大部分英國本土人都抗拒難民甚至移民，馬曼婷做得官（或議員），一定係顧住大部分選民而唔會盲撐香港移民。睇英國依家做法，新嘅移民措施可能今年上半年就會實施，根據之前調查，完全符合條件嘅港人移英家庭，可能得8%。
對於英國政府嘅移民政策，筆者唔話佢係騙局，始終佢哋有權改變移民政策，當中嘅根本，係2019、2020年時話要「支持香港人」，係一場西方國家「齊齊抽水」嘅政治行為，佢哋支持香港示威嘅熱情過去，一年復一年，對待移民當然亦會回到理性嘅考量，而理性嘅考量就係「唔想咁多移民」。依家嘅移英港人，可能計劃喺英國各地都搵自己選區嘅國會議員表達意見，筆者唔知呢招有冇用，但可以肯定一點係，喺英國政府眼中，大部分移民都可能係「冇用」，信英國政府，信自由民主？分分鐘「信者失救」……
收藏
取消收藏
分享
