文/稀思路
今日筆者喺展開主題之前，先想同讀者們分享一段純惡搞嘅設計對白（真係純設計對白）：
特朗普：如果各位有興趣，歡迎加入美國，但我哋只需要有用嘅地方/人物，唔歡迎垃圾。
丹麥：你話我（丹麥）係垃圾？
特朗普：唔係唔係唔好誤會，我唔係針對你，我係話美國之外，其他北約成員國都係垃圾！
讀者們可能覺得以上嘅設計對白相當無聊，但筆者請讀者們諗真啲，依家美國同其他北約成員國嘅關係，恰恰就好似以上設計對白咁，美國總統特朗普「入侵」完委內瑞拉，食髓知味，依家又擺明車馬要得到格陵蘭，明明丹麥以至其他北約國家都反對，偏偏特朗普就一意孤行，表明無論係輕易或困難，都要得到格陵蘭。最新消息，特朗普甚至表示，北約應該協助美得到格陵蘭島，似乎完全無視北約其他國家嘅存在，一副唯我獨尊嘅姿態。
如果美國突襲委內瑞拉，歐盟或北約都唔出聲，依家特朗普嘗到好處，面對格陵蘭，當然亦會有恃無恐。丹麥外相喺白宮同美國副總統萬斯、國務卿魯比奧會談，丹麥外相會後就強調，美國唔尊重丹麥領土完整同格陵蘭人民權利嘅觀點完全唔可以接受，仲話會面未能改變美國立場，好明顯特朗普想要征服格陵蘭，但丹麥認為，格陵蘭嘅安全喺現有框架內得到保障。
要分析美國想強搶格陵蘭，可以由好多觀點出發，之前講過嘅戰略位置唔講，筆者想指出有趣一點，就係北約（包括丹麥同美國）作為一個集體防衛嘅組織，如果有其他國家攻擊北約成員，其他成員都應該要一同防衛；但係，如果係一個成員國對另一成員國採取軍事行動，例如係美國入侵丹麥嘅格陵蘭，喺現有機制，應該係冇內容處理「成員國攻打成員國」，即係現有北約架構，可能無法回應美國入侵格陵蘭，呢個情況如果真係發生，某程度就等於成個北約武功全廢。
另一方面，特朗普表面上以地緣政治因由，表示一定要得到格陵蘭，筆者唔否認格陵蘭嘅戰略位置，但由突襲委內瑞拉，再到依家表明要強佔格陵蘭，筆者覺得特朗普更深層次嘅考慮，其實都係想轉移視線，想幫共和黨贏得中期選舉。如果共和黨喺中期選舉失利，第一個會出現嘅情況，就係議會拖後腿，特朗普未來兩年可能會成為跛腳鴨；更嚴重嘅情況，係無論會否成功，民主黨都會嘗試再彈劾特朗普。國內外施政都唔得，其實特朗普係玩緊另一場「豪賭」。
依家嘅北約（主要都係歐洲國家），喺全世界面前暴露咗一個嚴重缺點，就係當佢哋聲稱有集體防禦機制同時，原來只要攻擊者係美國，成個北約會即刻「企咗喺度」，除咗出口術根本做唔到其他嘢。之前，美國突襲委內瑞拉時，歐洲國家多數唔敢出聲，依家種大咗特朗普個膽，特朗普就即刻想再「食糊」，如果之前歐洲國家同中國佢哋一齊反對美國，特朗普怕得罪全世界，可能都唔會咁快就話對格陵蘭動手。國際關係上，有啲國家冇中國咁勇敢，以為美國霸凌「事不關己」，依家美國槍口對住自己先感覺到問題，係咪已經太遲呢？
收藏
取消收藏
分享
