【點新聞報道】早前卸任TVB總經理（節目內容營運）的曾志偉，之前接受《一周星星》主持黎芷珊訪問，談到擔任了五年總經理，志偉以四字形容「得不償失」。
志偉指失去了很多他理想中的60歲理想退休生活：「得係得到好多嘢嘅，都學到嘢嘅，原來做管理層係咁嘅；得到大家嘅肯定啦，最開心係街見到好多陌生人，三唔識七要行番轉頭搵我話：『多謝你呀曾生。』『多謝我咩呀？』『好好睇呀依家啲節目』，即刻成個人冧曬。」、「失係咩呢，我最記得我60歲生日嗰時，我猛咁同人講黃金十年呀，我呢十年要好好享受人生，趁行得走得wet得樣樣都得嘅時間…無端端臨尾仲要走番嚟TVB捱騾仔喎，又未做過喎最慘。」志偉續指，做電視圈、尤其TVB，是「冇得停架喎」：「好似做完港姐咁，聽日台慶又嚟喇，做完頒獎典禮又嚟喇，無止境地…不停度嘢諗嘢。」
芷珊指志偉白頭髮變多，志偉搞鬼笑指只是因為「沒時間」：「初初入TVB嘅時間哩，都染下（頭髮）啦，後尾都費事染，多得滯，我睇番返嚟嗰張相（啲頭髮）全黑架。」雖然白頭髮變多與健康無關，但志偉坦言擔任總經理期間身體確有變差，而其中一個源頭竟是因太過擔心開會遲到：「我最唔想開會，我最驚，責任好大，一定要較鬧鐘。因為你唔喺度啲會開唔成，我會好內疚，（變相成日）七點幾要起身，嘩！好大壓力。」、「唔夠熟睡個人精神會好差，以前我哋自然醒架嘛，邊使較鬧鐘！」
那志偉給自己在任表現多少分？他說：「50分！盡力就100分，好唔好可能得50分啦。我未做到要放棄一啲嘢，因為我哋人手有限，我都冇諗過有啲同事嚟辭職話，『你返嚟真係做死人，我過隔籬啲電視台好得閒，一年可能做一個節目架咋，你哋係不停手』，我先知道自己太癲，原來我哋度咗過千個節目，邊用得嗮！」
志偉又坦言五年任內確有「還剩一件未做的事」：「呢樣我覺得最遺憾，其實我自己最想做番一個，我哋香港大家都認可嘅音樂頒獎典禮，但始終我返嚟呢幾年都仲未做到。因為頒獎典禮必須有一個大家都好認可嘅音樂榜，我未夠時間去做好咁多音樂上嘅嘢，呢個係我唯一嘅遺憾，其實我唔止想做香港，我想做成個大灣區嘅音樂頒獎典禮，其實有籌備過，我都同好多大灣區唔同電視台開過會，但未喺我任期發生到。」
對於不少同事認為志偉是節目內容創作的「定海神針」，志偉謙稱自己最重要的責任其實是有承擔：「我哋做呢個位最緊要我哋有承擔，做得唔好要出嚟承擔，因為你知架喎，你畀佢哋做架喎。」、「就算有啲你真係唔知，你都要話OK，你要幫下面啲人孭先得嘅，同埋好多大膽嘅嘢我哋要去做，未必一定得，但都要試。」志偉續指當年讓周奕瑋一人主持整個《萬千星輝頒獎典禮》，便是其中一個十分大膽的嘗試。
至於辭任總經理後的打算，志偉笑言最開心是可以零企業包袱地回歸幕前：「我最想返嚟做咩？做港姐！問港姐問題。」志偉又指當初殺入無綫做管理層時，普遍不被看好：「全世界睇死我一定唔夠一年，『佢個人係咁，三分鐘熱度』，『好難得啦佢做五年』。」志偉透露真正退休後能抽空讀書增值自己：「因為我鍾意不斷有新嘢，其實我有好多嘢好想學，我報咗兩次名去學中醫，結果都係冇返到學。」經歷過身體透支的日子，他深切體會健康的重要：「到我退休，最重要就係健康，所以我先想讀中醫，學識點樣調理身體。」
回顧過去多年的主持工作及參與綜藝節目，志偉坦言對自己影響最大的，確是《獎門人》：「邊有人做一個節目做30年？同埋對我嚟講係自己最滿意嘅一件事，獎門人先至係我一個親力親為嘅節目，每條題目都係我自己起，每個環節都係我自己諗咁滯。」、「我（嗰時）每晚做完都請食宵夜檢討，啲人問『咁成功都檢討？』『成功先要檢討…點解好睇？點解上個禮拜唔夠好睇？因為多咗啲乜嘢？點解請呢啲人好玩？邊個好玩？佢有幾識玩？好玩在邊度？』其實檢討唔係話做差咗要檢討，做好都要檢討，點解好咗？！你搵到好嘅原因，你先至可以做得更好。」
志偉又謂最後悔的一件事，是曾於節目中因貪好玩向汪明荃阿姐「飛拖」，結果遭肥姐沈殿霞鬧爆「想死呀你」，志偉：「所以我點解話我最鍾意拍肥媽，係卒之有個人可以喝住我…最開心可以做小子，做小子可以講嘢當開玩笑呀嘛。」志偉又指即使做了多年主持兼大騷經驗豐富，但出台前還是免不了緊張：「係TVB先有咁多Live Show，全世界都冇，所以啲主持真係驚心動魄，明明去完洗手間，臨出都要再去一次，我個人冇手汗，但做主持臨出場會有手汗，你驚出錯吖嘛，係冇得返轉頭。」
（點新聞特約記者陳惠芳報道）
收藏
取消收藏
分享
