文/稀思路
時光飛逝，轉眼間2025年就要過去，筆者比較留意國際新聞，今年睇到嘅國際新聞，包括英國嘅、美國嘅，沒有最過分，只有更過分，前者將移英港人玩到氹氹轉，有冇資格申請永久居留都未知；後者仲過分，四處打壓話要吞併呢度、嗰度。其實今日世界，已經唔係由西方「說了算」，英美等國仲想玩弄唔同國家、人於指掌之間，會唔會太霸道？
先講下英國，關於英國政府嘅移民政策同方針，亂到筆者都有啲記憶混亂，首先係開始話要收緊移民政策，然後一大班移英港人有得震冇得瞓，及後澄清話唔關香港移民事。之後又有諮詢文件，話移民要符合英語同收入要求，有調查就指，如果真係有更高英語要求，可能只有8%移英港人家庭完全符合定居要求。感覺喺英國政府眼中，香港人只係可有可無，隨時可以放棄。
至於美國，成日被指為霸權國家，自特朗普再上任美國總統後，就更加霸道，甚至惡如強盜。特朗普一上任，就話加拿大係美國嘅一個「州」，搞到加拿大上上下下，馬上視美國如仇敵；與此同時，特朗普又話要吞併格陵蘭島，搞到格陵蘭同丹麥齊齊抗議，特朗普嘅作風，之前筆者亦指出過，係一種帝國主義。
最近，委內瑞拉亦成為咗美國目標，開頭美國話要禁毒，所以打擊委內瑞拉船隻，但禁毒方式唔係拘捕，而係轟炸，用軍隊殺人方式嚟禁毒，認真恐怖。事情一直發展，就打擊委內瑞拉嘅油船，原來搞咁多嘢，係為咗石油資源，而家仲玩極限施壓，要人哋總統落台。美國嘅一系列行為，唔係咩世界警察，係「世界大賊」先真。
英國同美國，驟眼睇好似行為唔同，但實際上所反映嘅，都係「帝國的傲慢」，英國政府嘅移民政策成日變，係因為根本唔會當華人、香港人係自己人，英國本土人除咗自己，其他移民都想趕走；至於美國，就係利益先行，哪怕加拿大係盟友，一樣無面畀。利益先行、排拒他人嘅英美，仲有咩可能為世界主持公道？
相比之下，讀者們睇下近年嘅中國，一直發展同壯大，但唔需要侵犯其他國家，亦唔需要以強搶行為展示實力，為世界經濟作出貢獻，亦出錢出力幫唔同國家。好明顯，喺傳統帝國主義之外，中國係要走一條和平崛起嘅道路，而且事實證明相當成功。不過，不惹事不代表怕事，近期日本試圖挑釁、挑戰，中國會怕咩？筆者想特別指出，當美國都唔敢同中國有正面衝突，日本仲想玩軍國主義，太天真了吧！今日中國非百年前中國，日本首相高市早苗如果識趣，就早啲道歉、撤回言論。
展望2026年，世界各地依然會亂，不過中國會繼續大放異彩。筆者祝讀者新年快樂，同國家一樣，百尺竿頭，更進一步！
收藏
取消收藏
分享
