文/稀思路
黑暴運動推手黎智英串謀勾結外國勢力罪等罪成，社會各界回應黎智英罪有應得，危害國家安全應該被重判。可能因為黎智英案太受關注，所以近日社會忽略咗一個同樣走入末路嘅團體，就係香港嘅民主黨。日前（14日），民主黨召開特別會員大會，主席羅健熙會後宣布民主黨已經通過解散及清盤，即日結束運作。民主黨解散同黎智英被定罪，看似係兩件事，其實當中原因都係一樣，就係兩者都選擇「義無反顧」地反政府、反中央，結果，當然係將自己推向死路。
1994年就成立嘅民主黨，其實至今已經超過30年，可以話係見證住香港政壇嘅變遷，對於走到解散同清盤之路，羅健熙就講到好婉轉，對於民主黨過去有冇「行錯路」，佢話民主黨用「當時」最充足嘅資訊去做決定，每個決定引領民主黨走到今日，對錯將來由歷史學家判斷。
筆者就覺得，羅健熙實在言重喇，因為將來就算有人去判斷民主黨功過、對錯，只怕都未必有咩歷史學家去研究，問題重點係，羅健熙講到民主黨對錯時，做咩講得咁隱晦？因為，民主黨真係行錯路！呢條錯路，其實同黎智英完全走歪路嘅起點相近，都係喺非法「佔中」前。
時間倒帶去2013年、2014年呢段時間，基本上當時嘅民主黨，就係支持非法「佔中」，到2014年9月「佔中」爆發，民主黨都係全力支持，當時部分骨幹成員，甚至有時會陪住黎智英去所謂「佔領區」留守，本來一直聲稱「和理非」（和平、理性同非暴力）嘅民主黨，就慢慢地走入咗違法「抗爭」嘅路。
之後到黑暴，當黎智英做黑暴最大推手時，其實民主黨都唔弱，當時就有民主黨嘅新生代議員，最擅長就係喺黑暴現場支援暴徒，有時甚至會擋喺示威者前，幫示威者擋住警察前進。一個本來反對暴力嘅政黨，一直演變，變成違法者嘅「同行者」，甚至自己都成為違法者。問題嚟喇，一個溫和政黨變得激進，甚至自己都一齊犯法，其實唔係民主黨被趕絕，而係佢哋自絕後路。
對於民主黨解散，筆者睇新聞見到有啲民主黨元老級人馬擺出一副「不可接受」、「好離奇」嘅姿態，但講真，佢哋唔係唔知咩事，而係唔想面對啫。喺香港反對派激進化嘅過程，本來民主黨只係見證者，開初仲會出聲譴責下暴力，點知自己之後被激進派牽住走，自己都激進埋一份。好多嘢係自己選擇，如果當時民主黨把持得住，保持「和理非」，其實都未必會有今日嘅下場。
民主黨同黎智英落得今日結局，其實係出於一樣嘅選擇，就係選擇抗爭、選擇違法，如果民主黨願意做和平理性發聲嘅政黨，又如果黎智英願意安安份份做傳媒唔勾結外國勢力，其實兩者近日都唔會分別成為新聞主角。而家，為民主黨同黎智英（尤其係黎智英）「洗白」嘅人有好多，甚至抹黑返特區政府，但講真，選擇違法同勾結外國勢力嘅，係黎智英本人或者民主黨部分人士，破壞完想當冇事？冇可能！民主黨同黎智英既然選擇咗不歸路，自然亦要面對今日嘅末路，十分公平！
收藏
取消收藏
分享
