文/稀思路
話說，之前稀思路寫文，指出英國政府想收緊移民限制，持BNO「5+1」計劃移民英國嘅港人，可能要過多兩三關，先可以申請永久居留，筆者仲寫，移英港人可以用返佢哋喺香港常用招數「抗議」，就係上街遊行。結果，筆者喺網上新聞睇到，真係有人咁做，而且喺英國街頭直叫英國政府「停止背棄港人（Stop betraying Hongkongers）」，其實，如果英國從來都唔當香港人係一回事，所謂背棄與不背棄，都唔係咩大問題喇……
睇返相關嘅網媒報道，上周六（6日），聲稱有近3000港人喺英國倫敦市心中心遊行，敦促英國政府唔好「背棄港人」，更有示威者高呼「（英國首相）斯塔默別做叛徒（Keir Starmer, don't be a traitor）」，有受訪女士指出，本來自己出年6月就可以申請永久居留，已經就到終點，但埋門一腳，英國政府卻可能加辣，短時間之內，根本無法達到新門檻，強調移英港人係被「連根拔起」。
喺報道入面，仲有正被特區政府通緝嘅前「學生動源」召集人鍾翰林，原來，佢係其中一個示威主辦人，佢聲稱根據諮詢文件，難民要等待20年先可以申請永居，「無入境許可」或「以訪客身份入境」人士提出永居申請需再額外居留20年，以佢自己為例子，可能要等40年先可以滿足入籍條件。筆者坦白講，如果等5年入籍已經係唔短嘅時間，要等40年係咩玩法？鍾翰林會唔會考慮，直接返香港自首就算？
雖然筆者只喺從文字報道睇呢單新聞，但大概都感受到一班移英港人嘅憤怒，可能喺佢哋眼中，當初英國政府話要「支援」港人，推出BNO「5+1」移英計劃，而家好多港人就嚟住夠五年，就可能喺英語要求、年收入等方面加辣，如果實行起嚟，變相對部分移英港人落閘。有人選擇移民英國，但原來自己，只係英國政府「用完即棄」嘅棋子。
筆者可能抽身一啲睇件事，其實黑暴時美國、英國聲稱要「支持港人」，嚴格嚟講係一種抽水行為，英國作為曾經殖民式管治過香港嘅國家，順勢推出BNO「5+1」計劃，算係凸顯出英國「抽政治水」嘅能力；而家，事過境遷，英國本身又陷入移民、難民過多嘅泥沼，喺英國本土人同外來移民之間，英國政府點可能會為咗移民而得罪本土人？同埋美國、英國等國家，又幾時係真正信得過呢？
從報道中，筆者仲睇到一點，就係有受訪港人話對工黨失望，而自己選區國會議員屬工黨，過去寄中文信件時看似「十分友善」，但至今從未為港人發聲。咁代表咩？可能係相關嘅國會議員，看到勢色唔對，已經企返去英國政府同英國本土居民一邊，英國人玩政治玩咗幾百年，真係唔係「省油的燈」！睇完成篇報道，今次遊行仲有一個後續，就係有部分示威者之後去反對興建中國駐英新大使館，其實呢班人，自己定居問題都搞唔掂，仲掛住去「反中」，好心啦，經過呢幾年，心態仲係「英美係主子」、「中國要反對」？佢哋今日喺英國落得呢個境況，客觀陳述，係自己選擇嘅。
收藏
取消收藏
分享
