文/稀思路
台灣係中國不可分割嘅部分，你知，我知，國際社會都知，偏偏就係有人借台灣嚟搞事，上任日本首相無耐嘅高市早苗，就發表「台灣有事即日本有事」嘅謬論，引嚟中國上下強烈譴責，睇返過去一兩星期嘅事態發展，好明顯高市早苗係有軟化，但就仲未肯道歉、收回言論。其實，唔單止中國同國際社會反對高市早苗，佢嘅執政聯盟一樣有暗湧，佢可唔可以喺首相個位「坐耐啲」，真係好難估！
話說，日本維新會本身應該係高市早苗嘅執政拍檔，但近日似乎有爭拗，事緣維新會嘅日本首相輔佐官遠藤敬就警告，如果佢哋同自民黨就減少國會眾議院議員數目進行嘅談判進展唔順利，佢哋可能就會退出執政聯盟；本來，因為有維新會以至可能加入嘅獨立議員，自民黨係可以保住「多數黨」嘅地位，如果有變會點？到時自民黨仲可唔可以執政，就係疑問喇。
日本維新會嘅建議係咪好，當然有斟酌餘地，但由此反映出嘅實況，就係高市早苗內外交困，其實喺高市早苗上台之前，自民黨就已經因為「黑金」醜聞而遍體鱗傷，高市喺黨內大佬力挺情況上台，本身就已經根基弱，仲要一方面挑釁中國，一方面擺唔平內政，咁點搞呀？
之前筆者上網睇咗啲分析，大概明白高市早苗插手台灣問題嘅盤算，最主要係想藉機修改憲法、擴軍等等；另一層考慮，就係希望增加返自己喺亞洲地區嘅影響力，但筆者可以講，高市早苗成件事錯晒！因為日本要搞事、搞局，唔係由佢自己說了算，國際層面嚟講，國際社會都支持一個中國嘅事實，仲有一點，就係高市早苗想喺亞洲搞事，連佢老大哥美國都唔支持佢。
有外媒就報道，日前美國總統特朗普同高市早苗通話，雖然雙方無透露實際傾咗乜，但外媒就爆料，其實特朗普建議高市早苗要克制，唔好再喺台灣問題刺激中國；雖然特朗普冇要求高市早苗收回言論，但筆者分析到嘅訊息好明顯，就係美國自己都要繼續同中國做生意，壓制唔到中國發展，你高市早苗「算個屁」！（純筆者感覺）
如果讀者們睇返依家日本嘅狀況，本身就係「本身狀況」都唔係幾好，同中國經濟交往深，根本就唔應該玩挑釁，結果高市早苗上台做首相仲想走極右作風，依家唔係「台灣有事」，只係「日本有事」。今年10月，日本嘅消費指數同比上升百分之三，係連續50個月同比上升，就算高市早苗搞經濟刺激計劃，相信都刺激唔到幾多；另外，當大部分中國旅客唔再去日本，咁日本旅遊業又點呢？
喺其他地方有種講法，話高市早苗民望無跌「維持高位」，不斷放出直接、間接挺高市早苗嘅訊息，筆者想問一句，民望、民調係咪可以當飯食？高市早苗靠極右路線上位，但唔該醒少少，由普通政客到首相，做首相係另一套玩法，如果國內經濟開始唔掂，連老大哥美國都要鬧你，高市早苗仲唔收手？可能喺日本人眼中，自己仲係強大民族，但我哋要睇嘅係事實，今日日本已經盡現頽勢，而中國就一直發展壯大，日本想搵其他國家去欺負、挑釁，揀中國？千祈唔好，高市早苗咁做，會毁咗成個日本！
收藏
取消收藏
分享
