文/稀思路
上回提到，英國政府祭出諮詢文件，表面上，移英港人仲可以用BNO「5+1」計劃定居英國，不過魔鬼在細節，可以等五年申請定居係真嘅，但英國政府好可能「加辣」，英語要求由B1升級至B2，亦加上一定嘅入息要求。英國政府如果真係實行，退休、主婦、英文差嘅人，幾乎都冇可能申請定居，筆者上網睇到，好多人批評英國政府背信棄義，筆者喺度諗，呢班移英港人多數都係「黃絲」，佢哋有冇諗住同英國政府抗爭呢？入稟告英國政府？定係要將香港黑暴複製到英國，同英國政府攬炒？
如果睇下唔同嘅網上平台，基本上對於英國政府嘅手法，一班移英港人係鬧到爆，有人話「如果真係B2就集體訴訟啦！」、「吹雞同英國政府打官司，時間倉促，不符合合理期望」、「政府朝令夕改唔丟架?識唔識英文一回事、平權係另一回事，請不要混淆問題」、「提高門檻冇問題，但唔可以違反當初承諾，朝令夕改」；當然，亦有人自我安慰，話移民得就投入英國生活，要加油、考好個試佢。
點解移英港人咁大怨氣，因為英國政府嘅新要求，其實十分「地獄」，英文要求由B1變B2，B2英語程度等於英國高考程度，個分數範圍可能介乎IELTS嘅6分至6.5分，筆者今次可以舉多一項數據，之前（較多年前），香港嘅大學生考IELTS，超過八成考生攞6分至7.5分之間，平均得分大約係6.7分，依家叫移英港人去考一個香港嘅大學生應有嘅英語考試分數，有幾多人過到關？
另一個難關，係收入要求，一年大約12至13萬港元收入，講真係唔難嘅，但如果有人係主婦，或者本身諗住去英國退休生活，咁佢哋點會有收入？移民英國嘅不同條件相加，最終能夠留喺英國嘅，應該就係英文良好、收入穩定、無欠債、了解英國而且無犯過罪嘅人，其實啲網民講得冇錯，英國政府依家做嘅，同當初承諾嘅係兩回事，一班移英港人後悔都冇用，如果唔合資格，一係走人，一係就「永續BNO」簽證……
大部分移英港人，坦白講都係「黃絲」，呢班人之前喺香港，批評政府、上街、支持抗爭等等，佢哋依家擺明被英國政府欺負，會唔會有下一步行動？有人話要告英國政府，筆者估佢哋唔會，因為如果佢哋提訴，可能起訴人呢輪告完，政府轉頭就話佢唔符合定居資格。咁會唔會上街遊行、示威？更加唔會，因為如果佢哋上街，可能會被捕，一被捕就有機會被視為違法，即係又唔可以申請定居。咁即係點，即係一班平時喺香港講嘢大大聲嘅人，畀英國政府「設計陷害」完，可能仲要同英國政府「講多謝」！
如果我哋回看歷史，就會知道英國政府完全信唔過，當年香港回歸祖國前，其實就有港人居英權嘅爭議，最後，英國梗係無畀居英權香港人啦；今日部分移英港人攞住嘅BNO，名義上可以用嚟移居英國，實際上要過晒所有關卡先有機會。有一點，相信移英港人以至其他移民仲可能面對，就係英國政府隨時仲可以為移民條件加辣，得閒加啲，得閒又加啲，加加下，可能最後留低嘅，主要得返有錢、有學歷同有貢獻嘅高收入人士。
收藏
取消收藏
分享
