【點新聞報道】聽好多移英港人抱怨英國呢樣唔好嗰樣唔好，好唔開心，近年亦醞釀一股回流潮。有移港英男分析直指，「好多對英國冇乜認識又冇乜錢嘅人，輕信之下，嚟到英國，就會覺得理想同現實相差太遠」。
該名移英港男在社交平台threads發文，話回流並非無原因，「英國除咗整體住屋售價及超市食材外，租金交通水電燃氣交稅等各類必要日常開支，遠高於香港。如果帶去英國嘅錢唔多，實在好難捱。捱唔住或唔想捱落去，回流係一個合理選擇。」
樓主直指，當初不少港人道聽途說咁移民去英國:「記得BNO移英政策推出初期，唔少新移英嘅港人，响網上或親友中間，猛講英國生活點樣容易點樣寫意」。
樓主批評他們樣樣講啲唔講啲，並舉出多個親耳聽到、親眼見到嘅例子，「每月八千港元可以養活一家四口，但原來只係食物開支，唔講交通租金council tax 重稅水電然氣通脹等等；做份倉工廠工，每月千幾英鎊，夠養全家，但冇講倉工廠工體力勞動要求有幾犀利；申請BNO VISA好容易，移民門檻好低，但冇講到埗後維持基本生活嘅門檻可以好高；影好多住英國大屋嘆世界嘅相，但冇講自己帶幾多錢到英國。」
樓主認為去或留自己決定，「與其日日抱怨英國呢樣唔好嗰樣唔好，一係就繼續努力適應，一係就返香港，一係就去另一個國家，都比成日抱怨好。」
收藏
取消收藏
分享
