文/稀思路
之前兩篇文章，筆者都寫過，關於移英港人面臨嘅種種問題，包括生活唔好想回流，以至係隨時被英國政府「加辣」要走人，英國政府可以先郁難民再郁合法移民，果然，英國政府並唔係「開善堂」嘅，有最新報道指，港人多數會用嘅BNO「5+1」移民安排「維持不變」，不過，其他條件就可能會加辣，包括英語水平要求同收入水平，如果相關政策真係執行，英文差或者冇收入嘅人隨時拜拜，英國政客果然係「綿內有針」，一邊講支持，但另一邊可能就不動聲息地趕走移民。
根據報道，英國政府維持BNO「5+1」計劃係真嘅，但其他方面可能就收緊移民門檻，包括英文程度要達與A-level相若嘅B2水平，個人入息以年收計算不得少於當地基本免稅額的12570鎊（約12.8萬港元）。筆者睇多少少內容，由英國內政部發出嘅諮詢文件，「BNO港人在申請永居時，需符合與其他移民一致的更高門檻」，認真弔詭。
首先呢，英文水平可能由B1級提升至B2級，讀者們唔好睇只係「1」同「2」嘅分別，因為B2程度嘅英語水平要求，其實已經相當於英國普通教育高級程度證書（A-level）水平，之前筆者上網睇過，可能大約等於考IELTS嘅6分，6分看似唔高，其實已經係香港報讀部分碩士課程嘅英文要求；講真，部分移英港人如果連用英文做基本溝通都唔易，仲要嚟一個B2要求，咁英國政府係想留住香港人，定係趕走香港人，真係心照不宣。
除咗英語要求，仲有收入要求，相關要求係3至5年內，每年接近要有13萬港元嘅收入，呢個亦係個人免稅額水平，對比起BNO「5+1」計劃目前係冇最低收入門檻，呢度又多一度關卡。睇埋其他已有條件，包括對英國歷史文化嘅測試、無刑事紀錄、無欠款欠稅等等，不同的條件相加，筆者綜合出一個感覺，就係要留喺英國，可能係搵到錢、識英文嘅中產人士先可以留低。
暫時睇，相關條件或要求係英國政府嘅諮詢文件，表面上，英國政府係「歡迎」港人移民繼續留低，但睇真啲，或者講白啲，英國政府只係想留下對英國有貢獻、幫英國搵到錢嘅人留低；之前有唔少低學歷、低收入嘅香港人都學人移民去英國，筆者當你年收入十幾萬港元唔難，但同時要符合晒所有要求包括英語水平要求，其實英國政府係唔歡迎部分港人先真。
在過去一段日子，英國執政黨、在野黨不斷搬龍門，由想趕走移民到話支持港人移民，再到支持但「有條件」等等，其實英國政府思想上就冇真正當港人移民係一回事，黑暴時支持你，冇事時踢走你，好符合「大英帝國」嘅自利風格。今次英國政府嘅諮詢、計劃會唔會落實，筆者仲未知，但有一個可能出現更壞情況，就係英國政府可以「加辣、加辣再加辣」，到最後可能仲有BNO「5+1」移英港人，但留低嘅，可能已經慢慢由基層到中產，中產再到得返有錢人留低。當初辭工、賣車、賣樓移民去英國嘅人，最壞情況，就係耗盡積蓄去英國「發一場夢」，所以筆者一直唔相信西方國家政府，真係有道理㗎。
收藏
取消收藏
分享
