文/稀思路
喺之前一篇文章，筆者就指出，唔少喺英國嘅港人，其實都生活得唔開心，有人性格變得內向，準備返香港生活，亦有人喺網上大罵英國係「垃圾國家」，表明要返香港，唔同人喺英國有唔同遭遇，但都係指向一件事，就係喺英國生活唔多掂。最近，筆者喺網上睇到單新聞，又關英國事，今次講難民申請定居安排，本身等五年，而家可能要等廿年，真係唔係講笑，廿年...人生有幾多個廿年呀？
話說，英國內政大臣馬曼婷就公布，被形容為「現代以來最重大改革」嘅非法移民同庇護制度方案，同一啲北歐國家方向一致，重點在於收緊庇護資格、提高遣返效率，睇詳細少少嘅內容，今後，英國向難民批出庇護後，只能以「臨時身份」留英，而且會每30個月重新審查，一旦原居地被認為係安全（唔清楚點定義），難民就可能隨時被遣返。
最重要嘅重點係，之前喺英國住五年可以申請永久居留，喺新安排之下，係需要廿年，係現時等待期嘅四倍；其他安排，仲包括如果難民有值錢嘅財物，有可能會被扣起作為費用來源，因為英國政府依家單單係用喺庇護嘅安置費用，每日就超過5000萬港元，成本咁高，係因為英國有租酒店畀難民住。
表面上，呢單嘢唔關移英港人事，但其實報道都提到，英國政府指出，會繼續肩負支援有需要人士，又特別提到烏克蘭人同香港人。呢度就有啲吊詭喇，英國政府嘅講法，意思包括如果認為「原居地安全」，難民可能要「返屋企」，咁香港點？香港一直都安全，只係黑暴運動期間，有暴徒打砸搶燒，當時英國政府政治上腦，話要「支持香港人」，所以搞出BNO「5+1」計劃。依家事過境遷，英國又需要同中國修補關係，咁移英港人等緊嘅永久居留，會唔會五年變十年，十年變廿年，或者將來有機會直接cut off（中斷）？
其實過去一年多時間，移英港人嘅權利，已經唔止一次被公開提到，之前政府講過可能要檢視，亦有在野黨將移英港人視為目標，唔同政客講完想處理，之後又話「會繼續支持港人」，如果真係冇諗過郁移英港人，根本一開始就唔需要提。又或者，英國政客係一次又一次試水溫，如果英國本土居民都支持郁移英港人，咁政府亦不用客氣，再提高港人申請永久居留嘅門檻，英國政客喺度計緊嘅，係將來大選嘅選票。
依家英國成個政治氣候，除咗係講緊經濟問題，仲係講緊治安同公共資源，當中難民同移民問題，基本上大部分英國人都認為要處理。今日英國政府先收緊難民申請永久居留，當搞掂之後，發現英國人/選民仲未滿足，就可能會向烏克蘭、香港等移民落手，總之攞到選票，要死要返香港，都係移英港人自己嘅事。
有啲移英港人「戀英」，但佢哋同英國政府係「單戀」定「雙戀」先？黑暴運動過去，所有「政治水尾」英國都抽乾晒，仲有咩必要收留移英港人？仲有一樣嘢，就係英國政府就算唔收緊居留年限，一招審視移英港人有幾多「經濟貢獻」，一樣可以不留痕跡地踢走移英港人，其他人點諗，筆者唔知，但由2019年到今日，筆者都係堅持，西方國家係信唔過嘅！
收藏
取消收藏
分享
