【點新聞報道】英國買新樓中伏！有不少移英港人在網上大吐苦水，話買入2年的新樓已經漏水嚴重，搵發展商執漏，對方又諸多推搪， 藉口多多，有嘅話保養期已過，有嘅話非結構性問題，叫業主自行處理。不少網民都留言批評英國樓質素每況愈下。
在英國從事房地產、網名為「英國潮濕仔」的移英港人，在社交平台發文話近排好多英國新樓爆漏水事故，「呢幾日唔少新樓業主inbox我，亦有行家問，內容九成一樣，啱啱滿兩歲嘅new build，突然漏水。最神奇係，連apartment都中槍。」
英國天氣長年潮濕多雨，漏水問題相當普遍，樓主指全部個案都是同一套路，「經過上星期兩日嘅大雨，天花、牆身開始出現水漬，亦有一家個廚房浸咗。業主即刻搵發展商，點知換嚟嘅回覆，真係每次都令人哭笑不得。」
樓主直指發展商常常將個問題踢返畀業主，完全唔使負責，「發展商一聽到歲樓就好似自動播放一樣：『過咗兩年保養啦，我哋處理唔到。』；有啲比較有責任心嘅，會派個師傅上門望一望，然後正式宣佈：『唔係structural問題，屬於一般維修範圍，業主自行處理。』；仲有更加經典嘅：『你冇清flat roof drainage，所以漏水唔關我事』」。
樓主提醒業主與發展商交手時，要加倍謹慎小心，「同發展商講每句嘢都係段練緊心智，冇返咁上下EQ都搞唔掂。回覆發展商要好小心，佢地鍾意口講口賠但係會捉住你所寫嘅每一粒字。」
帖文獲少網民認同 ，「呢10年newbuild，真係間間都長Ｘ質素。自己睇路」、「所以有好多人講千祈唔好買new build」、「英國新樓啲質素越嚟越差」、「曾經，英國係優秀嘅象徵；宜家，卻淪為已發展國家衰落同劣質嘅代表」。
收藏
取消收藏
分享
