文/稀思路
攬炒派、「港獨」分子，佢哋唔少都有一個特質，就係講嘢異常激昂，藉此煽動人心，講到自己好偉大，又會講到自己好勇敢，但事實係點？可能當佢哋叫人衝完之後，自己亦會搵機會「閃」或潛逃。之前，「港獨」分子黃台仰，曾經喺旺角暴動時，好勇敢地跳上車、煽動其他人，到之後梗係被捕啦，佢曾經公開畀香港市民一段錄音，寄語港人「寧為玉碎，不為瓦全」，不過佢之後就潛逃咗去德國，正式成為通緝犯。最近，佢又出現喺公開眼前，公開抹黑中國，其實講到自己咁型、咁偉大又咁為民，不如返嚟香港自首先講啦。
根據一啲網媒報道，「歐洲香港人聯盟倡議委員會主席」黃台仰，日前就喺德國一個會議上，利用佢自己嘅「話語」去抹黑中國，提到「西方式民主」等等，又聲稱中國開始喺德國唔同城市「滲透」。佢講嘅嘢，好似有啲理論底咁，提到自由、政治、公民團體等，但筆者又會諗，佢講嘅係真理，定係歪理呢？
第一樣嘢筆者留意到嘅，唔係佢嘅所謂論述，而係佢嘅「歐洲香港人聯盟倡議委員會主席」身份，筆者上網睇，有資料話呢個聯盟，係由8個在歐港人組織組成，宗旨包括「為港人爭取權益」、「在歐洲各國議會及歐盟進行倡議工作」、「育及推廣香港文化」，筆者想問下組織其實有幾個人？有咩代表性？憑咩代表歐洲港人發聲？還是根本係，幾個反華分子就當成係一個聯盟？
至於黃台仰喺公開場合所抹黑中國嘅，涉及民主呢個理念，如果係筆者睇資料，似乎黃台仰都未必否認，西方式民主會導致分裂同唔和諧，其中特朗普再當選美國總統就係一個例子。但係，當佢聲稱中國「滲透」、要對抗中國時，筆者會問，中國即使有同德國唔同城市建立關係，係合作，定係「滲透」呢？如果但凡中國同海外國家、地區合作，都要被扣上一頂又一頂帽子嘅話，咁點樣國際合作呢？同埋黃台仰清唔清楚，國際關係嘅基本倫理，就係需要國際合作。
今時今日，用黃台仰嘅話，佢係可以繼續屈中國嘅，但讀者們睇真啲，德國喺科技上， 一啲關鍵材料依賴中國，供應鏈又部分依賴中國。如果睇埋德國嘅國際市場，中國更加係德國嘅一大貿易夥伴。以筆者理解，即使依家喺中國嘅市場份額有所減少，但德國其中一樣最強嘅產品——汽車，都非常依賴中國。黃台仰喺德國破壞中德關係，如果佢嘅身份係德國一個「政治難民」（有可能已經成為公民），德國政府係咪容許佢挑撥先？
老實講，黃台仰人在外國，可以講到好型，又可以講到自己「站位好高」，去指點德國政府等點處理中德關係，但事實上、本質上，黃台仰係一個逃犯！旺角暴動佢有份策劃、參與，筆者相信佢自己都唔會否認（至少證據上佢好難否認），如果佢強調正義、倫理，筆者想直接地問一句，點解佢唔承擔返自己應有嘅罪責？當一個人連自己應負責任都唔負，然後一走了之潛逃海外，佢有咩資格喺公開場合講到自己、「聯盟」以至論述大義凜然？當年佢有份參與嘅旺角暴動，係一場明顯要毆打警察、破壞社會嘅行為，一個通緝逃犯，講國際倫理、關係前，應該先做返一個人。
由2016年旺角暴動到2019年黑暴運動，包括黃台仰在內嘅政客或違法分子，佢哋口口聲聲為香港好，但實際行動都係破壞緊香港；依家黃台仰喺歐洲搞組織，其實講到底，就係一個反華組織，黃台仰等人所做嘅，畀人感覺都係想抹黑中國。如果黃台仰嘅身份係一個「難民」，或者因「難民」身份而取得德國公民資格，各界要問下德國，點解包庇完暴力嘅香港逃犯，仲要縱容佢公開抹黑中國？依家德國同中國關係唔算差，德國方面，千祈唔好畀個別人士嘅政治攻訐，影響到兩國關係；要認清一點，黃台仰唔係為咗德國好，而只係想繼續抹黑中國、攬炒香港咋。
收藏
取消收藏
分享
