【點新聞報道】移民並唔係口講咁簡單，否則一步錯就後悔一生。有港爸在網上發話打算一家三口，帶九萬港紙移民他國，不過仍未決定去英國定澳洲喎。帖文旋即激起大批網民的質疑，「一家三口9萬移民澳/英你認真？」、「九萬港幣？一家三口？移民？去一次旅行都無咗啦」、「9萬美金都唔夠照顧自己啦」。
該名港爸在社交平台threads發文，話打算帶埋老婆和3歲女兒移民，家中只有他一人外出工作，認為如果在香港月薪有3-4萬，去到外國照搵返3-4萬的工，便可以應付開支，「喺香港，好多人都係搵3/4萬左右，如果，去移民，都係搵3/4萬左右，一家三口，生唔生活到？因為喺香港啱啱夠」。
港爸計劃一家三口帶九萬身家移民，當中已包括簽證費同租樓，不過仍未決定去英國定澳洲，但就諗定做餐館樓面，「一落地諗住搵份中餐樓面做住先」。他還口響響話「仲有三個月拜拜」喎。
帖文引起網民熱議，幾乎一面倒負評，「莫講話9萬，揸住90萬我都覺得好快見底！btw樓主諗清楚，嗰邊住屋除非有人接濟，否則9萬蚊可能揾屋都冇咗一半，仲要樣樣都交稅連收入都計稅，唔係講笑，仲有你理想諗住搵返三萬，除非已有offer」。
有網民直指，「移民一家4口預1球港紙燒係基本，如果你一家3口真係最少50萬先夠，除非地獄mode住basement唔買車去foodbank」、「仲有三個月點解可以仲未決定？整visa要時間，寄家檔又要時間，小朋友唔使讀書咩？搵學校都要睇定吧」、「你話仲有三個月就走，但去英國定澳洲都未決定？吹水咋？」
港爸回應話「無計，唔係有錢人 」、「真係無咁多錢」，有網民勸說「唔係有錢人就留喺香港，去咗海外就貧賤夫妻百事哀」，港爸反指「留喺香港都係差唔多，咪又係咁可能係患難見真情」。
收藏
取消收藏
分享
