文/稀思路
最近，稀思路有個朋友由英國返香港，雙方傾談之間，原來對方已經有打算「永居移回」香港，佢無講原因，亦冇話喺英國搵食有好大困難，但佢今次返嚟，以前嘅開朗性格似乎消失咗，變得有啲深沉，言談之間，亦透露過喺英國果邊冇乜消遣或娛樂，甚至因為收入等問題，連購物欲都「消失」。老實講，人哋嘅事，唔講亦無謂多問，不過筆者睇網上消息，想回流香港嘅人，似乎都唔係絕少數。
例如，最近網上就有則帖文，一個移英港人高調宣布「要回流香港」，雖然佢嘅言論唔係好長，但就似乎對英國相當唔滿，甚至直言「呢個垃圾國家，留返俾你地玩」，喺英國就好似喺一個美食沙漠，日日唔係三文治就薯片，英國政府諗盡辦法揸乾打工仔，除咗高稅率，又係咁搵機會罰人錢，「周街難民」，直言攞到護照都唔會留低，只好當自己去咗Working holiday（工作假期）。
無獨有偶，早前另一則網民發帖，怨氣就更加重，雖然事主冇返香港，或者係返唔到香港，但怨恨程度，就連自己屋企人都怪責，呢位年少事主，批評自己家人以「為咗佢好」為藉口，將佢帶到英國讀書、生活，結果幾年下來，大學生活冇朋友，畢業之後搵唔到工，又冇錢返香港玩，冇錢去亞洲旅行，人生最青春嘅幾年，就喺英國度過。
呢位事主，都係用「垃圾」嚟形容英國，筆者唔會用呢種詞語去形容英國，但一個深刻嘅事實，就係英國問題多，其中一位「放負」移英港男，就有網民留言支持佢，話自己喺香港20幾年都相安無事，但到咗英國，兩年來畀人爆格（應指入屋爆竊）、扑車、打劫，樣樣都齊；其他批評英國嘅言論，亦包括當地難民多等等。如果一個地方唔安全，咁仲點住落去呢？
以上嘅討論、言論以至留言，係一啲移英港人嘅真切感受，其實佢哋未觸及到一個好致命嘅問題，就係以BNO「5+1」計劃移居英國嘅香港人，其實喺英國嘅命運可能係「待定」，雖然依家政府、在野黨喺反反覆覆之下，聲稱BNO「5+1」計劃維持，但之後會否變好難講；而且，如果之後加上英語能力、經濟貢獻等更高要求，相信有部分移英港人隨時拜拜，佢哋唯一嘅貢獻，可能就係過去幾年喺英國花咗一筆錢幫英國刺激消費。
選擇喺一個地方生活，經濟、社交、天氣甚至飲食，都可以係重要因素，筆者覺得最重要、最根本一點，係安全！就如網民所講，喺英國生活，被爆格、扑車、打劫樣樣齊，之前筆者寫文都講過，如果係唔重要嘅偷竊等案件，其實英國有地方警察連處理都未必會。相對之下，香港明顯安全得多，早前有機構發表《2025全球安全報告》，其中「民眾安全感」一項，香港喺144個國家和地區中高居第6位，贏足英美「幾條街」。到底港人應該移民定留喺香港發展，其他人筆者唔知，但筆者必定選擇香港。
收藏
取消收藏
分享
