【點新聞報道】外賣中伏！有港男發文大呻嗌炸雞外賣宵夜，竟發現舊炸雞上面有隻「碎咗嘅曱甴」，遂透過外賣平台要求退款，結果凌晨3點遭食店老闆回電「發晦氣」，話「呢舊係麵包糠」，更表示可以退款，但要求港男以後不要再光顧。港男直言「真係嬲到Ｘ街」直接收線，並向食環署舉報。
該名港男在社交平台threads發文講述事發經過，指日前透過外賣平台嗌外賣宵夜，發現炸雞然內藏有一隻壓扁了的曱甴，細看下有翼有腳，「舊炸雞上面有隻碎左嘅曱甴」。於是致電向老闆反映，但對方沒有接聽，於是向外賣平台要求退款，結果凌晨3點遭食店老闆回電「XX我發晦氣」。
老闆惡人先告狀，問樓主為什麼要求退款，樓主解釋「有隻扁咗嘅曱甴喺舊炸雞度」。老闆否認「唔係曱甴嚟，呢嚿係啲麵包糠炸咗黐咗上去就係咁樣」，樓主回覆「吓，有翼有腳喎」，老闆則稱「話咗唔係，唉算喇我退返畀你，你以後唔好再嗌喇」。樓主強調，「吓你而家真係有曱甴喎，唔係我屈你喎師傅，咩叫以後唔好嗌」，惟老闆續打發樓主，話「你唔信嘅話我退畀你喇，你以後唔好再落我單」。
樓主當堂着晒火，憤而反擊「你冇X嘢下話，你而家真係有曱甴仲發X我晦氣，我見有曱甴已經係諗住打畀你同你講但係你唔聽，咁咪撳要求退款，你而家3點先打返過嚟發晦氣又唔認......你今次有曱甴唔認仲要打過嚟X返我轉頭，你自己衞生問題唔認仲想鬧我屈你要退款？」。
老闆即刻笠水，話「唔係咁嘅意思……即係你都嗌咗咁多次啦，你都未見過有曱甴啦……我見今次張單300幾蚊，平時啲人郁啲就話要退款，冇餐具又退……」。樓主認為對方強詞奪理，「咁唔係我問題喎，人哋退款係人哋嘅事，你今次有曱甴就係你有問題啦，你咪自己睇返張相囉，邊忽似麵包糠？」。
樓主提到，「老闆話其他人成日嗌少少嘢就話要退款，係見到我張單貴少少就覺得我係呃退款之類.……然後我仲係好嬲說話放心，我以後唔會再嗌㗎喇，然後直接cut佢線」。
樓主講明唔會有下次，並已向食環署舉報，「講真呢間嘢其實本身都嗌咗好多次，老闆平時係幾好人，有時落單會免費送多少少炸嘢畀我，所以本身見就算有曱甴都係諗住退返錢再同佢講聲就算，結果換來嘅係畀老闆打電話Ｘ返轉頭」。
帖文引來網民熱議，「會唔會係鹹竹蜂」、「好似有埋曱甴卵...」、「咁都叫麵包康，你叫老闆食來睇下」、「似植物多啲…係咪d香料嚟」、「其實我都覺得唔似小強，但係佢態度好差」。有業內人士留言「作為餐飲業負責人，經驗話我知呢舊一定唔係麵包衣。至於係唔係炸小強，就真係講唔埋，但就咁睇係唔太似嘅 」。
不少網民贊成樓主報食環，「有曱甴係嚴重食物衞生問題喎」、「老闆咁委屈，報食環驗清楚，大家都放心」、「多人呃退款係真，不過今次好明顯係出事 」、「報食環等食環驗係唔係曱甴囉 」。
收藏
取消收藏
分享
