文/稀思路
自黑暴運動開始，外國勢力對香港嘅干預近乎從未停止過，佢哋唔止係支持攬炒派咁簡單，其實佢哋係想香港冚檔，想香港有咁亂得咁亂，如果唔係中央及時制定香港國安法，到底香港會點，真係不堪設想。最近，本來已經踏入判案階段嘅黎智英案再起波瀾，有報道聲稱，喺上周嘅中美元首會晤，美方要求中方釋放黎智英，講真，黎智英係禍港頭目、國安要犯，點可以美方要求「放人就放」？
日前外交部發言人毛寧主持例行記者會，被問到相關問題，毛寧嚴正地表示，黎智英係反中亂港事件主要策劃者和參與者。中國中央政府堅定支持香港司法機關依法履職盡責。香港事務屬於中國內政，不容外部勢力干涉。香港特區政府回應事件時，亦表明由於黎智英所涉及法律程序尚在進行中，任何人均不應評論有關案件。其實，特區政府已多次強調所有案件均嚴格根據證據同依照法律處理。所有被告均嚴格按照香港適用法律（包括香港國安法），並喺基本法同《香港人權法案》保障下接受公平審訊。
對於黎智英，筆者覺得應該以幾個核心問題去看待，而唔係用外國勢力視角「放人」，首先係黎智英係何人？黎智英一直被視為禍港頭目，除咗金援香港嘅反對派政客，佢之前嘅《蘋果日報》更可以話係黑暴運動嘅最大推手，明明係暴徒，佢哋叫「衝衝子」；明明係縱火嘅暴徒，佢哋稱之為「火魔法師」，每逢有黑暴大事件，《蘋果日報》近乎從未「缺席」，唔少年輕人受煽動上街，黎智英絕對有「功勞」。
至於黎智英被捕同被告，唔係因為佢嘅傳媒老闆身份，亦唔係因為佢立場係反對政府，而係佢確實涉嫌觸犯香港國安法，今年8月控方陳詞時，已經講明黎智英喺香港國安法生效前後繼續犯法，一直請求制裁、封鎖或其他敵對活動，筆者到今日仲記得，黎智英除咗喺公開場合講過自己「為美國而戰」，甚至透過《蘋果日報》要求特朗普介入香港事務。佢有冇罪，或者幾大罪，應該由法庭判，而唔係由外國勢力去干預。
關於司法案件嘅原則，其實特區政府都講得非常清楚，所有司法案件包括黎智英案，所有程序依法辦事。讀者們諗下，由黎智英被捕、被告、提堂、審訊、結案等，全部都係依法、依程序辦事，喺法庭上，黎智英有機會透過律師或自己申辯，包括可以反駁控方嘅指控。佢係有罪冇罪，冇可能由外國勢力「口講口賠」，而係法官審視所有證據後再作判決。即使黎智英罪嫌極重，香港始終堅持法治，所有程序依法合規，對黎智英亦公道。
有一點比較特別，就係黎智英其中一項控罪，係「串謀勾結外國勢力危害國家安全」，依家唔同國家包括美國嘅外國勢力，不停地發聲干預黎智英案，係咪更加顯示到佢哋過往甚密，甚至有不可告人秘密呢？情況就好似捉咗一個疑犯，話佢係賊，連同其他人犯案，當呢個疑犯努力撇清同其他人關係時，其他人就不斷出聲「維護」佢，咁佢哋點可能冇嘢？由非法「佔中」開始，黎智英嘅禍港角色就十分清晰，外國勢力所謂支持佢，根本就係包庇黎智英以至其他禍港政客破壞香港，其心狠毒呀！
收藏
取消收藏
分享
