文/稀思路
因為中美關稅談判，有關中國同美國角力嘅新聞，近日又再成為焦點。根據最新消息，雙方嘅經貿談判有最新進展，預計美國唔會對中國加徵100%關稅，而中國亦可能會暫緩稀土管制，談判可能帶嚟雙贏局面，而筆者就覺得，因為中國果斷出手，美國變得被動，所以今次其實係中國喺關稅戰上又一次勝利。對於美國反反覆覆地針對中國，筆者一定要指出，美國唔係剩係要佔中國便宜，而係想將中國置於死地，關於美國嘅狼子野心，不得不察！
近期有單關於美國攻擊中國嘅新聞，主流媒體以至市民未必好留意，話說，國家安全部日前發表聲明，直指美國國家安全局（NSA）自2022年3月起，對中國國家授時中心發起長期網絡攻擊，當中目的，係要針對嘅國家通信、金融等關鍵領域，如果唔係中國掌握到美國黑客蹤跡，粉碎咗網絡攻擊嘅陰謀，可能會導致全國通信故障、金融系統紊亂、電力中斷、交通癱瘓等等，甚至影響國際標準時間計算。事件亦說明，真正嘅黑客帝國，明顯又係美帝（美國）。
筆者喺網上睇過一段分析，大抵意思，係話美國攻擊中國嘅授時中心，只要中國嘅授時、官方時間被竄改一毫秒甚至微秒，好多系統就會即刻唔準時，可以製造出災難性後果，可以話係「差之毫秒，為禍極深」，美國惡意攻擊，對準中國命門，相同道理，喺關稅戰上面，美國當然都係想置中國於死地。
由美國總統特朗普喺4月發起關稅戰以嚟，其實最大嘅攻擊目標，由始至終都係中國，當一啲國家因為貿易問題而被迫妥協，只有中國堅持不跪。嚟個逆向思考，中國唔止係唔願意跪，更加係唔能夠跪，一向美國屈服，除咗關稅可能照被狂加之外，美國仲可能會要求中國大量購入美國不同產品，大額將資金投放到美國等等，情況就等同有賊想打劫，自己主動打開夾萬畀人攞錢一樣。
睇返今次關稅談判，有幾點中方立場值得社會各界了解，首先係關於稀土出口管制，中方完善體系，係正當做法；美國濫施關稅，係嚴重違反世貿協定。對於芬太尼問題，責任根本在美方自身，與中國無關，而關於雙方貿易問題，中方一直認真履行協議，反口、搞事同挑釁嘅，由頭到尾都係美國！筆者覺得，如果唔係中方反制有力，美國依家可能已經予取予攜，猶如強盜一般去掠奪中國資源。
經過過去幾個月嘅中美交往，筆者觀察到一個現象，就係今次中美博弈，中國喺顯出氣度之餘，反制亦相當合時。關稅戰之初，美國攻一次，中國反攻一次，發展到近期，美國頻頻出招滋擾，中國都唔駛咁客氣，一招稀土管制，美國即刻「企定定喺度」。其實，博弈嘅本質，就係先估計對手嘅策略，然後制訂最適合自己嘅對策，喺中美博弈，中國由多年前被動，之後變成對打，到今日作出有力反擊，美國想看輕中國，睇下去到最後，誰怕誰？！
收藏
取消收藏
分享
