文/稀思路
近幾個月，美國以至世界流行一句話嚟形容美國總統特朗普，就係「Trump Always Chickens Out」（TACO），意思即係「特朗普總是臨陣退縮」。點解要咁講，相信讀者們都好清楚，因為自特朗普掀起關稅戰以來，美國進一步，中國還一拳，得唔到甜頭嘅特朗普，就開始玩退縮。最近，喺稀土問題上，特朗普似乎都係TACO，一個可能係世界上最有權力嘅男人，原來咁軟弱？
如果讀者們有留意近期關稅戰再起，會睇到美國仲係不斷針對中國，不過中國就不受這一套，一招管制稀土，大大力咁戳中美國甚至歐盟嘅要害，如果冇稀土，唔好講芯片、先進電子產品仲做唔做到，美國嘅F-35戰機以至一啲戰艦，基本上都冇得再製造落去。中國出大絕，特朗普退縮，都係預料之內。
10月19日，特朗普喺總統專機空軍一號上面見傳媒，講到最近中美關稅戰時，就話自己對中國購買大豆表示樂觀，希望中國「至少好似以前咁購買大豆」，又強調可以對華減關稅，但唔希望中國同美國玩「稀土遊戲」。言下之意，就係中國出到稀土牌，美國即刻陷入困境。
如果讀者問稀思路，筆者會覺得中國打出稀土牌係非常合理，首先係美國明明同中國談判緊，但仲不斷使出陰招針對中國，包括針對中國註冊甚至係中國製造嘅船隻，既然美國唔講武德，咁中國又何必客氣呢？俗語有云先撩者賤，美國更係一邊拉住中國傾，一邊搞中國，國家唔忍，相信讀者們都會支持。
講開稀土，咁重要嘅戰略資源，其實要管制、批准先出口，國家都好合理，而讀者仲要留意一點，就係美國近年喺科技領域打壓中國，先進芯片唔畀賣去中國，荷蘭嘅先進光刻機（製造芯片重要工具）又唔畀賣去中國，既然成個西方陣營封鎖得中國咁高興，咁如果中國經審查後唔賣稀土畀啲國家或者公司，咁呢啲國家又可以攞啲咩去做芯片、手機甚至戰機呢？
老實講，喺整場貿易戰，甚至放大少少講整場西方圍堵中國嘅博弈，中國一直都好克制，關稅戰不斷升級，責任全在美方。如果美國仲諗住攞芯片嚟封中國喉，筆者會講，呢招五年前有用，但呢幾年，華為等企業其實都開始研製自己嘅芯片，速度、功效可能不如美國先進，但係寧願用自己嘅免煩，總好過依賴美國，否則隨時又被禁運芯片去中國。
近日，筆者喺網上睇到單新聞，芯片巨霸輝達（NVIDIA，英偉達）嘅總裁黃仁勳，公開話輝達喺中國嘅佔有率由95%跌到0%，呢個數字是否真確，筆者都唔敢講，但造成呢個局面同埋迫中國自主創新嘅，就肯定係美國政府。當中國芯片製作愈來愈成熟，除咗滿足本地市場需要，將來仲可能可以外銷同輝達搶市場。退一步講，如果稀土不足，輝達芯片都可能欠缺關鍵材料而造唔成。依家成個勢，特朗普似係開始冇牌打，如果美國真心想談判、和解，唔應該靠嚇，應該先取消關稅同其他貿易壁壘，否則要人信美國政府？我信你個鬼！
收藏
取消收藏
分享
