文/稀思路
喺唔同嘅文章，稀思路一直反覆強調，就算英國政府唔取消BNO「5+1」移民政策，佢哋都可以有唔同方法去減少港人移英數目，經濟能力可以係一個門檻，延長居留期可以係一個門檻，再絕一啲，直接提高英語水平要求，令部分英語能力差嘅移民港人「自動再見」。依家睇個勢，事情的確有可能成真，因為英國內政大臣馬哈茂德14日宣布，要求申請特定類別的移民簽證者，至少具備B2級英語能力水平 ，相當於英國高級程度會考（A-Level）水平。新規定冇講BNO「5+1」簽證會唔會受影響，但只要英國政府一聲令下，移英港人就會馬上多一道「定居鴻溝」。
根據傳媒報道，英國官員指出英國始終歡迎為社會發展作出貢獻嘅移民，去到英國就必須學習英語同履行應盡義務；暫時，有關英語水平嘅新規會適用於於「技術工作簽證」、「增長型企業工作簽證」以及「高潛力人才簽證」申請者，要求喺口語、聽力、閱讀和寫作四項，都要達到B2水平。由B1水平去到B2水平，係咪只係爭少少？筆者可以話畀讀者們聽，絕對唔係。
如果特定簽證申請者只需要達到B1級嘅英語水平，其實就係基本掌握英語嘅能力，大約等於英國普通中等教育水平；但B2級呢，就等於提升到英國高級程度會考（A-Level），用生活角度去講，就係要到理解具體或抽象複雜文本主旨嘅能力，可以流利自然交流，甚至就多主題撰寫詳實文稿、闡述複雜觀點。有個位筆者覺得幾諷刺，就係英國嘅B2級英語水平，其實連好多英國本地人都達唔到。
就好似英國政府咁講，實施英語水平新規後，相關類別嘅移民可以每年減少至少10萬人，讀者們試想一下，如果將新嘅英語水平要求擴至其他簽證，包括港人常用嘅BNO簽證，以至係烏克蘭人士用嘅簽證，基本上英國政府冇講過要踢走「一個」港人移民，但一項英語要求，就自動篩走部分英語水平唔得嘅移民。從政治角度睇，英國政府十分高章；但從現實角度睇，其實英國政府都十分無情。
整個英國嘅氛圍，就係反難民、反移民，有人認為英國只係反對非法移民英國嘅難民，其實，部分英國人係覺得近年英國太多「外來人」，未必會將非法、合法移民分得咁仔細，即使有部分英國人偏向支持移英港人，但呢種想法未必係主流。依家喺英國，最強勢、極右嘅改革黨先係大熱，極右政黨最旗幟鮮明嘅立場，就係反對移民，平心而論，當自己移民去一個國家，但呢個國家極度反對移民，就算真係定居咗，係咪真係會有幸福，非常值得斟酌。
近年，我哋社會用多咗一個詞，叫「組合拳」，其實依家英國政府（在野黨亦有自己倡議）喺移民政策就開始打出一套屬於英國嘅「組合拳」，先喺語文、居住年期等方面入手；如果情況仍未受控，加一項「對英國經濟有貢獻」，又即刻篩走多一班人。喺英國政府嚟講，更多嘅移民，為英國製造「更多嘅問題」，BNO「5+1」嘅由來，來自2019年一場黑暴運動，咁運動失敗咗，英國政府又唔需要藉機攞政治光環，BNO「5+1」存在與否，其實對英國政客以至社會嚟講，根本都唔係咁重要。移民英國係個人選擇，但認清環境還是必須的。
收藏
取消收藏
分享
