【點新聞報道】中秋佳節向來是家人聚餐的日子，有港女發文大呻買了雪糕月餅與家人品嚐，叫酒樓女侍應幫忙雪在冰格，可當飯後侍應端上雪糕月餅時，卻見上枱時雪糕月餅已溶掉，只剩朱古力造的外殼。然而，最嬲是對方的態度，不但反指是港女的問題，更表示「唔知雪糕月餅要雪喺冰格」。
該名港女在社交平台threads發文表示，當日訂了酒樓的兩圍酒席，包房與家人做節，到達後先將雪糕月餅交給女侍應冷藏，並有講明「雪喺冰格」。可當飯後侍應端上雪糕月餅時，只見雪糕月餅中的雪糕已完全溶化，只剩下朱古力外殼，「叫酒樓阿姨幫我雪住個雪糕月餅，唔知佢係咪聽唔明中文，雪到咁」、「講緊我哋包房食飯，哭咗，下次食返奶黃（月餅）算」。
樓主立即向經理和侍應投訴，惟對方態度差劣，「經理嚟到個阿姐就話：唔知雪糕月餅要雪喺冰格」、「仲要態度好差同我講 係我問題」。樓主直斥「成件事雪糕溶咗唔嬲，係態度出事」。
至於酒樓又沒有補償或道歉，樓主表示不作追究，「因為屋企人話人哋犧牲同屋企人慶祝中秋嘅時間嚟服務我哋，所以唔追究」，樓主表示，「純粹係見到啲小朋友有啲失望，然後酒樓阿姨又態度差… 嬲嬲地先講吓 」。
事件引來網民熱議，「唔係個個都識雪糕月餅，但你講咗冰格，阿姨又真係唔夠醒目」、「正常酒樓冰櫃通常放急凍生肉，個樓面真係放冰櫃你都唔敢食啦」、「通常酒樓攞嚟放客嘅蛋糕嗰個雪櫃，都唔會有冰格，個阿姐可能就係就咁幫你放咗喺嗰啲雪櫃」、「其實酒樓啲冰格，雪完可能多咗好多其他味，BTW雪櫃都未必係乾淨」。
另有網民分享類似遭遇，「我曾經試過同一遭遇」、「我都有喺酒樓食雪糕月餅，好彩屋企人有帶保冷冰種唔係就真係融晒」、「上次生日去酒樓食飯，叫佢哋幫我雪住個蛋糕都融咗」。
（本文為作者觀點，不代表本媒體立場）
收藏
取消收藏
分享
