【點新聞報道】話說不少港人跟風移民前，都沒有認真思考「自己係乜嘢新絲蘿蔔皮」。一名港女近日發文話好想移民去英國，但又自知身體差、經濟條件又唔好，所以想話先去旅居喎。結果被不少網民勸退，「旅居同真移民係兩回事」、「一個人真係唔去好過，如果無fd/親戚住附近真心200%會後悔」。
有港女在社交平台threads發文話好想移民去英國，但因自身條件有限，而裹足不前，「自己一個人真係唔夠勇氣，身體差之餘，經濟都係一個考慮嘅因素」。樓主慨嘆人生苦短，唔想有遺憾，所以想話先去旅居，「移民前去旅居幾個月係咪會好d？去歐洲旅居幾個月可行嗎」，又話「就係想去英國住2個月，歐洲去咗幾次了，非常鍾意。」
不少網民都勸樓主三思，「我住咗喺英國三年幾就嚟四年，我可以話畀你聽..好多人喺移民之前嚮往嘅同你真係落地住嘅係完全兩回事... 」、「旅居同真移民係兩回事 旅居都仲係旅行心態，適應下環境 移民你就要諗埋工作 」、「一個人真係唔去好過，如果無fd/親戚住附近真心200%會後悔」。
有網民分析單身移英的利弊，「身體差唔建議嚟，自己一個人，生活會好難的。香港周街都係醫生，去醫院都方便，英國睇醫生唔係咁容易，長期病我就唔清楚，香港唔想煮隨時出街食就得，唔會貴得去邊，英國夜晚冇嘢好食的，出街食又貴，你一個人生活，如果身體差，仲要煮飯洗衫做家務，會好辛苦」、「英國醫療非常差，政府會cut醫療服務，會變得更加差。This is from一個住在英國四十年嘅港人，我有幾個客人係在NHS做專科醫生，佢哋都好灰好心淡」。
不過，亦有網民鼓勵樓主踏出第一步，「咪去旅居半年，搞得掂就住耐啲，搞唔掂就返香港」、「移民不需要勇氣，衝動就可以，過黎住一個月當旅行，又可以去歐洲玩」、「經濟許可可以試下住幾個月先」、「我覺得可以試吓， Nothing to Lose，不過要有足夠資金，大概20幾萬」。
收藏
取消收藏
分享
