文/稀思路
近月，外界又開始關心美國TikTok嘅交易或協議問題，早前美國總統特朗普就喺白宮簽署咗一項行政命令，批准一項畀TikTok繼續喺美國營運嘅方案。對於簽署行政命令批准TikTok交易，特朗普認為命令、協議嘅剝離會容許美國人繼續使用TikTok，同時保護美國國家安全，仲聲稱新公司將會由美國人所有，TikTok完全由美國人營運。當特朗普講到美國「全勝」時，事實係咪咁呢？稀思路可以話畀讀者知，特朗普對外嘅聲稱，有誤導成分，不能盡信。
綜合各方消息，即使各方真係完成交易，會成立新公司管理TikTok演算法、數據等，但其實，TikTok喺美國營運，應該係將會包含兩個主體，第一個係字節跳動TikTok美國公司（BD TikTok US）由字節跳動100%持有，呢個亦係新方案中嘅主體運營公司；另一個主體，就係為TikTok美國數據安全合資公司（TikTok USDS Joint Venture），將負責TikTok美國數據安全、內容保障、軟件保障及相關本土業務。
就咁睇，可能外界都會有啲亂，點解有兩間公司都係美國嘅TikTok公司？筆者用比較簡單說話去解釋，繼續由字節跳動100%持有嘅公司，可以話係主體運營公司，會負責美國業務、商業同其他運營活動，例如係電商、品牌廣告等；而另一間公司，即係特朗普口中講「美國人所有」嘅公司，其實就係負責數據安全、內容保障等等。兩間公司各有分工，筆者會喺下面分析細節。
首先，繼續由字節跳動完全持有嘅公司，用最直接嘅講法，就係賺錢業務基本上都係掌握喺字節跳動手上，利益冇受損；至於特朗普口中講嘅另一間公司，其實特朗普話由美國人所有，都係有誤導，因為新嘅合資公司，其實字節跳動仍然係單一最大股東，依家字節跳動嘅全球股東，據報佔股亦最少有30%左右。如果整個協議順利推展，就係數據安全部分由美國睇住，但係賺錢部分呢，Sorry，基本上都係由字節跳動去掌握。
復旦大學國際政治系教授沈逸就分析過，TikTok USDS嘅方案，其實同之前蘋果iCloud喺中國嘅「雲上貴州」方案，有好大嘅相似性，都係將運營國用戶數據儲存喺運營國嘅服務器上，以解決運營國對相關問題嘅關切；但今次TikTok唔同嘅係，字節跳動喺TikTok USDS都係單一大股東，喺均衡企業利益、商業規則以及國家安全關切方面嘅實踐，都有進一步嘅創新。
外界如果唔了解事件，可能會以為特朗普「贏麻了」，但係TikTok喺美國嘅安排，賺錢業務都係由字節跳動去控制，再按比例分錢畀新合資公司；而新嘅合資公司，字節跳動都仍然係單一最大股東，喺呢個情況下，嚴格嚟講，特朗普政府係將數據畀美國企業睇住，但係呢，無論喺做生意、演算法擁有權等，都仲喺字節跳動手上，所以真正贏家，筆者認為係中國政府嘅外交勝利先真。
今次TikTok協議，其實仲有一層意義，就係喺新嘅國際局勢下，如果中國企業要喺其他國家「出海」，今次TikTok嘅解決方案，可能可以成為一個參考。假若今次TikTok協議落實，成為咗範例，中國企業日後「出海」，如果都遇到演算法、知識產權以及數據安全問題，數據或者可以由運營國企業去睇住，但關鍵資產如演算法、商業活動如廣告等，都要繼續掌握喺中國企業手，保證中國國家利益，符合企業權益，又能合乎當地法律要求。如果讀者們仔細留意暫時係最新嘅美國TikTok方案，仲可以睇到一個事實，就係美國執意打壓中國，但始終佔不了中國便宜。
收藏
取消收藏
分享
