【點新聞報道】今時今日仲咁嘅服務態度！有港女在社交平台發文大呻，日前在灣仔連鎖食店因使用洗手間而和店員發生爭執，被指責「整塞馬桶」，更遭惡言侮辱及推撞，直斥對方是「餐飲業嘅害群之馬」。
該名港女在社交平台threads發文憶述事發經過，表示在灣仔莊士敦道一間連鎖食店被清潔工惡言侮辱及推撞。她稱平日時常在灣仔一帶「打躉」，有時會光顧該食店，事發當日她打算在餐廳點外賣，因為「好鬼急」，所以先用洗手間，「但好不幸地，廁所嘅沖水功能壞了」。她隨即告知當時當值的清潔員工，對方就話：「係咁㗎，廁所啲水係咁少。」
女事主不以為然，回到點餐機繼續餐點，「我『哦』一聲就去機器點外賣。」豈料，該員工突然衝到她身旁大聲指責：「你唔好將抹手紙掉落馬桶，你依家整塞咗個馬桶喇！」事主隨即澄清，「事實係，當時我並沒有將抹手紙掉在馬桶，我掉在馬桶的是，馬桶旁邊提供的捲紙。正常一般啲卷紙都好易沖。我亦都唔係用咗特別多紙」。
之後，女事主與該員工一同回去檢查馬桶，惟對方堅持是她將抹手紙掉在馬桶，令馬桶堵塞。事主用手機錄下事件經過，「想網上以及email公司紀錄事件並投訴」，此事該員工便激動地推撞事主，又一直在店內不停地高聲辱罵。事主無奈表示：「香港嘅餐飲業有呢啲咁嘅害群之馬，又點會好呢？」
帖文引起網民熱議，有網民力撐事主，「睇片都見到個店員好惡」、「好惡頂… 佢可以阻止你影 ，但唔係一手車落嚟囉。」另有曾光顧該店的網民分享不快體驗，「見識過了，態度真係唔好，叫我調位，客人未答應就已經搬走客人食物走。幾冇禮貌。」、呢間分店員工係好無禮貌，我之前去過一次，我自己坐二人枱，坐低咗諗住嗌嘢食，之後有兩位入，女員工叫我起身，讓張枱俾人，仲要我坐廁所位。明明我入先，點解要讓人，佢哋又遲過我嚟。讓都唔緊要，個員工又大聲又無禮，我嚟食嘢，唔係嚟受氣，我咪起身走」、「呢間嘢灣仔店好Ｘ癲，上次用2蚊券問券券佢趕Ｘ我出門口」。
女事主補充後續發展，指收到該食店公司的電郵要求刪除帖文，指「該影片中包含可辬識人身分的資訊，基於個人資料保護相關法律的情況，帖文有可能觸犯相條例並對閣下產生不利影響。」惟女事主認為該公司沒有交待怎樣處理事件，故會暫時保留帖文，「雖然我真係有啲驚，但既然大家爆料爆得咁積極，咁我就暫時保留呢個貼文啦，等市民選擇餐廳之前停一停，諗一諗。」
收藏
取消收藏
分享
