文/稀思路
之前寫文章，稀思路唔止寫過一次，BNO「5+1」移英計劃，唔一定係100%有保障，第一係因為推出計劃嘅時間，係一個好特別甚至可以話係西方國家好「反中」嘅時代；第二係英國近年愈來愈多移民，部分意見根本就歡迎外來人。最近，英國在野極右改革黨（Reform UK）開記者會，宣布如果執政，會大幅收緊移民同福利政策，包括香港、烏克蘭移民都會受影響。即係點？如果極右改革黨上台，唔好講「5+1」攞英籍，可能只能無止境「等等等」...
睇返報道，極右改革黨嘅倡議，係包括廢除現行移民喺居留英國五年後可以申請永久居留嘅身份制度，改為每五年續期一次嘅工作簽證取代，並認為此舉可以防止移民領取福利；方案又建議申請入籍嘅居住年期增加至7年。
要推行相關政策嘅前提，係極右改革黨要「上到台」先會推行，睇返依家英國國會，650個議席當中，佢哋只係佔有5席，從議席數目睇係好少；不過，其實佢哋嘅支持度一直上升，更以28%支持率喺民調領先，比起執政工黨，仲要高出8%，下屆英國大選可能喺2029年舉行，如果極右改革黨執政，移民政策肯定會翻天覆地。
極右改革黨支持度咁高，根本係因為佢哋極右、保守甚至排外立場，得到英國人嘅認同，日前（13日）喺倫敦就有一場大遊行，有接近15萬人參與，係英國規模最大嘅極右翼集會，集會遊行主題係咩？答案係「停止非法移民」，示威者表示要驅逐所有非法移民；讀者可能會覺得，香港移居英國嘅，都係合法移民，但英國部分人覺得「凡是移民都會搶福利」，又點會分得咁仔細，一邊反移民一邊支持移英港人？
之前，英國首相斯塔默就宣布過會收緊移民措施，在新系統之下，將會終止喺英國居住5年嘅人自動獲得定居同公民身份，除非佢哋對經濟同社會有「真正而持久的貢獻」，否則，必須喺英國居住10年先可以申請永久居留。相關文件意思，就可能包括BNO「5+1」同烏克蘭簽證，兩者或屬於「臨時性人道方案」，即係英國政府唔一定將相關計劃當成永久移居計劃或者長期政策，依家極右改革黨又推兩下，即係執政黨同在野黨之間，都唔一定會100%攬實移英港人。
BNO「5+1」移英計劃，到底何去何從，將會係一場政治角力，結果最後係點，好睇支持BNO「5+1」嘅力量，能否戰勝極右改革黨甚至執政黨嘅意志，筆者睇得好簡單，最核心嘅問題係，英國至少有部分人，就從來都冇覺得移英港人係「自己人」，移居英國嘅港人「戀殖」，但「愛情」係雙方嘅，有政治需要時可以係「自己人」，無利用價值時就係「陌路人」，隨着愈來愈多移民/非法移民湧入英國，如果讀者們係當地人，會點諗？如果寄望無血緣關係嘅外國去支援、收留香港人，當香港人係「自己人」，其實無異於緣木求魚。
收藏
取消收藏
分享
