文/稀思路
香港有班人，成日聲稱香港冇言論自由，美國好，英國好，「西方國家一定好」，但有呢啲諗法嘅人，唔理佢係黑暴支持者定普通黃絲，佢哋有冇真正了解過喺英美尤其係美國發生嘅事呢？最近，美國總統特朗普「盟友」柯克遇刺身亡，肯定係國內最受關注嘅新聞，柯克之死，喺美國牽起一陣餘波，有名嘴借機串特朗普，結果被暫定節目。其實，呢單只係特朗普打壓傳媒、言論自由嘅其中一件事，特朗普喺美國以至世界嘅玩法，根本就係想逆我者昌，順我者「亡」。
話說，美國廣播公司（ABC）名嘴金摩（Jimmy Kimmel ）認真夠膽，當大家都知道唔可以大膽地評論柯克之死時，佢似乎就連特朗普都唔驚，指出特朗普攻擊兇手之餘，挑起社會對左派嘅仇恨，筆者睇網上評論，金摩有一句話說特朗普「不像是哀悼好友，而更似一個4歲細路哀悼一條死咗嘅金魚」。玩到咁串，特朗普梗係報復啦，佢嘅手下甚至威脅，可能吊銷ABC嘅牌照，所以ABC亦識做，暫停咗金摩嘅節目。
筆者評論一向求公道，金摩平時點串特朗普係一件事，藉死人嚟攻擊特朗普，的確係唔啱，有啲嘢係有底線嘅，只係成件事，又唔完全係讀者睇得咁簡單，ABC之所以迅速暫停金摩嘅節目，其實佢哋仲有個考量，就係佢哋有一個62億美元嘅合併項目，等待緊「聯邦通訊委員會」（FCC）嘅同意或者准許，如果佢哋唔快快手處理金摩，吊銷電視台牌照就未必，但係想FCC同意新項目，肯定就冇可能。
如果說特朗普今次針對金摩有道理，呢個表述未必可以話錯曬，但重點係，特朗普針對嘅，根本就係所有反對佢嘅傳媒！早前，佢就講過應該吊銷所有唱衰佢嘅電視台牌照，如果讀者睇下新聞，其實特朗普同時喺傳媒界打緊幾條戰線，包括向《華爾街日報》提出誹謗訴訟，索償100億美元，以及入稟告《紐約時報》要求賠償150億美元。誹謗案件，可以要求索償百億美金？難怪有人話美國就係「律師天堂」，有乜唔啱，律師幫你「玩大佢」。
上周五（19日），法院就駁回特朗普入稟控告《紐約時報》等人索償150億美元的要求，法官指出，特朗普團隊嘅狀書，充滿謾罵，而且違反聯邦案件嘅民事程序，又冇切中要點，畀特朗普喺28日內重新提起並修改訴訟。有一點好搞笑，法官除咗認為狀書措詞浮誇，仲批評狀書反覆且過度讚美特朗普，超出法律文件嘅合理範疇。
從一紙狀詞，再睇特朗普針對傳媒人、報紙以至電視台等行為，筆者有個好奇位，點解啲攬炒派分子，唔出嚟譴責下特朗普？自筆者小時候開始，就被灌輸西方國家「自由同開放」，但讀者們要諗諗，西方民主國家，都係可以隨時開倒車，特朗普用「民主方式」上台，但上任後就完全唔民主，點解？因為西方國家嘅制度，可能已經適應唔到世界變化，過去被捧到天咁高嘅「兩黨政治」，依家變成兩極化、多極化，諗深一層，柯克之死，又何嘗唔係政治兩極化，兩邊互相仇恨之下產生嘅悲劇？
收藏
取消收藏
分享
