【點新聞報道】自古「婆媳關係」都是家庭中的難題，有移英新抱發文揶揄一齊住的奶奶，話當初奶奶自恃大學畢業，所以唔使考英文試，諗住拎到英國護照就返香港。點知，早前發現畢業證書有問題，可能要考英文試，惟有死死地氣報英文班上堂，但之後又嫌三嫌四，新抱直言「好想佢拎唔到Passport返香港」。
該名移英新抱在社交平台threads分享奶奶在英國的生活，指奶奶自恃大學畢業，就坐定粒六，捱夠六年拎到英國護照便返香港，「初初嚟英國嘅時候奶奶話佢大學畢業，所以唔使考英文試，而嚟到英國呢三年佢話自己唔識聽、唔識講、淨係識睇，所以一直都唔想講英文避得就避。總之過咗六年拎到Passport就返香港。」
作為新抱同兒子都有勸她融入英國生活，「我哋有建議佢返英文教會，佢話聽唔明（平時有返開香港人教會）；建議佢搵隔籬屋傾吓偈，唔肯去；建議佢得閒睇吓英文YouTube，依然堅持日日睇香港Channel同韓劇；建議佢去報英文班上下堂，成日話full晒無得上」。
然而，奶奶早前發現其畢業證書有問題，可能要考英文試。樓主指，奶奶終於肯報英文班上堂，不過就不斷抱怨，「上完第一堂話啲同學有口音講啲英文唔好聽，一啲都聽唔明，淨係想同講純正英文嘅人講嘢。」今次兩夫妻同一陣線都希望奶奶受到教訓，「之前我話老公把口好衰成日好想睇奶奶入唔到籍，呢刻我都係咁諗好想佢拎唔到Passport返香港」。
查實新抱一直認為奶奶浪費時間，「我哋唔洗佢點做家務唔洗煮飯，佢呢3年大部份時間屋企睇劇，日日睇8個鐘以上 」。兩夫妻都覺得奶奶唔會拎到英國護照，「我同老公都覺佢抆水，佢唔知要Instruction letter，以為有張畢業證書就得，唔想樣樣提佢，唔想俾佢次次做伸手黨」。
收藏
取消收藏
分享
稿件由上傳 · 文責自負 · 不代表本網立場
