【點新聞報道】今年情人節（2月14日），方力申突發宣布跟拍拖兩年的藝術家女友葉萱（Maple）結婚，再於4個月後的父親節（6月15日）自揭快將榮升爸爸。他接受查小欣主持頻道節目專訪，首度公開求婚與結婚當天一氣呵成、既浪漫又驚險的難忘回憶，更罕談父母對Maple捲入邪教事件的接受與包容。
小方年過40，與Maple又相處愉快，加上希望父母享兒孫福，忽然一個機會出現，小方立即好好把握：「咁啱我要去拉斯維加斯做活動，好方便（註冊結婚），阿媽就話不如結埋婚，有個好好嘅朋友幫我預訂一系列嘅嘢，租咗架飛機掛住『Will You Marry Me』，大家以為好貴，但其實只係五位數字。」
萬事俱備，期間卻發生連串蝦碌，令小方滴汗再滴汗，他笑着憶述：「第一個笑話，飛機比原定遲咗45分鐘先嚟，換衫嘅時候，證婚人嚟咗再多個驚喜，簽埋紙，求婚加結婚一次過進行！」求婚最緊要驚喜，小方卻險被媽媽穿煲！「太太（Maple）臨時臨急話唔去拉斯維加斯，我阿媽就打開口牌：『你去啦，佢（小方）可能會同你求婚！』跟住太太問我，我話冇可能，一定唔會！當離開拉斯維加斯，佢就覺唔會。但原來洛杉磯都得，佢以為冇咗呢件事，去到真係求婚嗰一刻，佢都愕然，再結婚簽紙就更加愕然！」結婚當日，小方所穿的粉紅色西裝，是去年到英國觀看溫布頓男單決賽與湯告魯斯合照同一套，至於Maple那襲漂亮婚紗，小方不禁讚自己：「我都幾叻，我太太嗰兩套婚紗，都係我目測上網訂，我太太係模特兒身形，一着就fit！」
除了外在條件，Maple的內在美亦令小方感覺與眾不同，小方說：「我覺得佢好唔同，之前去歐洲旅行，返嚟乜都冇買過，佢唔係好需要呢啲，食嘢又係好貼地，同我一樣生活比較簡單，當然佢天真樂觀嘅性格，都係好吸引我！」早年Maple捲入邪教事件勇敢發聲，小方坦言拍拖一段日子後才跟父母交代：「我媽咪好支持佢，還攬住女朋友話：『無論你將來同我個仔得定係唔得，我都當你係我個女！』我聽到第一係如釋重負，第二覺得好窩心！我老竇都係非常愛佢，暫時都係同我爹哋媽咪一齊住！」
（點新聞特約記者陳惠芳報道）
收藏
取消收藏
分享
