【點新聞報道】HOY TV劇集《我愛九龍城》進入結局篇，其中岑麗香（香香）、陳家樂和栢天男（Adam）的三角戀令人看得牙癢癢。由於該劇是香香復出之作，令她一直非常興奮。
香香說：「之前忙緊自己嘅生活，好耐冇拍劇，啱啱返到工作嘅崗位，開頭嗰幾日都唔知自己喺度做乜嘢！好似未回魂咁，過咗幾日之後，就好投入好開心好入戲，亦都享受拍攝嘅過程，好似搵返自己嗰團火，跟住對手又好人又靚仔，簡直完美呀！」
原來Adam與香香並非首次合作，香香說：「好多年前有個function，我就係做模特兒帶呢位大明星出場！行紅地氈咁，當時瘦啲冇鬚，其實同依家都冇乜分別！另外，雖然我哋兩個都喺外國長大，但係拍劇嘅時候梗係用廣東話溝通啦！咁樣好笑啲㗎嘛！記得我哋圍讀嘅時候，我哋兩個劇本都寫曬自己先識嘅火星文拼音，跟住我哋仲可以互相學習，抄功課！」
對於和劇中角色比較，Adam笑言現實中的香香和劇中的琳琳分別好大：「香香真人係一個公主，好sweet，但係劇中角色就係一個有啲lost嘅角色。」相反香香就覺得Adam戲裏戲外都一樣帥及事業有成。
雖然劇集的拍攝時間不長，但香香已經經歷了人生的悲和喜，她笑言：「我記得我生日嗰一日就係拍攝嘅第一日，絕對係好意頭！當年我選美都係喺生日期間，咁樣即係代表時運高！另外就係拍攝期間我個仔仔撞爆咗個嘴入院，當時仲陪佢入院瞓，好傷心㗎！兩個仔仔同老公當然都有投訴少咗見我啦！有咩辦法喇？唔使交學費咩！哈哈哈！」
（點新聞特約記者陳惠芳報道）
收藏
取消收藏
分享
稿件由上傳 · 文責自負 · 不代表本網立場
