【點新聞報道】中伏！一名港女在深夜路經旺角登打士街一間餅店，想買清蛋糕回家，正當她駐足考慮時，店員表示就收舖「$16/件比你啦」，惟結賬時，竟收取$50/3件。港女當場提出質疑「16乘3係48喎！」，惟對方竟表示「唉，嗰$2你都同我計」，令她深感不忿，直斥「明呃錢！」。
有港女在社交平台threads發文憶述事發經過，指當時大約深夜12點半，好多舖頭都已關明，見到還有間賣蛋糕仔的餅店仍未關門，於是駐足櫥窗考慮買唔買，指「直徑3吋左右既清蛋糕一件$20-24，唔算抵」。期間，一名男店員出來向她表示「就收舖 $16一件 平d比你啦」。女事主回應一句「好啊」，便繼續諗買咩味。隔唔夠一分鐘，店員再次表示，「唉，買3件，$16/件比你啦，平啲就閂啦」。女事主遂決定買返去同屋企人分享，「三件都消化到嘅」。
由於女事主身上無現金，店員表示可以用Alipay電子支付，並隨即展示付款二維碼時表示：「$50得啦」。女事主當時隱約感到一種奇怪的感覺，於是打開計數機計算一下，店員當刻又再用一種「唉 就收工先平比你 蝕住做咋」嘅語氣大大聲咁講：「唉，平啲比你，收你$50得啦」。
女事主當場質問店員「$16乘3係$48喎！」豈料店員竟表示「唉，嗰$2你都同我計！你咁嘅！」，女事主據理力爭：「你話$16件我先買！」店員就回一句「你咁嘅」。女事主不想再糾纏下去，於是付款後便急步離開，「我嗱嗱聲比完錢就走，一句都唔想同佢講多！」
女事主續指，「返到屋企好嬲咁講返件事嘅同時食蛋糕，全家一致認為好難食！乾噌噌！芝士嘅無芝士味！開心果都無開心果味！清蛋糕最基本嘅蛋香都無！流心嘅醬一味死甜！$16件真係畀多佢！」女事主認為難食都是其次，「最嬲係佢分明想呃錢！」，希望大家看到帖文後「千祈唔好中我中過嘅伏！」
帖文引來網民熱議，不少人認為「咁都得，擺明呃你喎」、「畀我唔買，直接走」、「咁唔老實！唔係$2都同你計，係你連$2都呃扮平咗咁！最差係啲嘢難食，樓主慘慘」、「做生意最忌真係唔老實，唔係2蚊嘅問題，係誠信。一開始講好幾多就幾多，最唔要得出古惑」、「我發覺而家有好多人都『借啲意』側側膊唔多覺，估唔到連麵包蛋糕都要呃人嗰$2，仲要用電子支付都要呃，電子支付就係為咗明碼實價」、「如果係我可能會話，你做生意咁唔老實㗎，我唔買啦，跟住轉身就走」。
收藏
取消收藏
分享
