文/稀思路
之前，稀思路都同讀者探討過，英國可能將BNO「5+1」定居計劃，增加至「10+1」，即係攞住BNO移居英國嘅香港人，可能要坐多五年「移民監」先可以成為入籍英國，呢件事對於喺香港生活嘅港人嚟講，唔係好關事，但對於攞住BNO移居英國嘅人嚟講，就好大件事。最近，英國國會就辯論有關問題，唔同議員發言好積極，但英國官員回應就好吊詭，BNO計劃係「5+1」定係「10+1」，仍然有待觀察，要睇下英國政府點define（定義）移英港人嘅身份。
話說，英國國會喺周一展開辯論，回應港人同移民團體發起請願，「要求維持BNO同技術勞工簽證『5+1』申請入籍嘅現行措施」，經過幾小時辯論，唔少有港人聚居嘅選區代表議員都有發言，反對政府將BNO簽證嘅定居門檻，由「5+1」變成「10+1」，有議員就話BNO計劃出台後，有人指出BNO移民計劃唔可信，如果英國真係搬龍門，就即係應驗咗人哋講嘅嘢。
有議員反對BNO由「5+1」變成「10+1」，咁英國官員又點答呢？睇返報道，英國邊境安全及庇護部國務大臣諾里斯就話，（英國）政府會繼續堅定支持喺英國同即將抵英嘅港人，「BNO簽證承諾不變」，政府將會繼續歡迎港人，但政府亦明白，能夠獲取定居資格對港人社區至關重要，所以保證會「聽取有關定居途徑嘅意見，一直如是，喺呢段期間，現行BNO定居規則會繼續適用。」
呢種答咗又好似冇答嘅回應，可以有唔同解讀，例如喺某啲媒體，筆者就見到有報道以「好多議員反對改動」為編輯方向，予人感覺係英國政府可能想郁，但受到不同議員嘅強烈反對。但係有時，事情總係可以有唔同面向，讀者們睇真啲上一段政府回應，英國嘅大臣答得十分之「虛」，一方面表示繼續歡迎港人移民，但係講到實際政府走向時，就只係話計劃暫時不變，政府會「繼續聽意見」，即係，政府如果改BNO簽證政策，仲係可能「5+1」變「10+1」。
英國人喺過去「幾百年」都玩開政治，面對英國人嘅說話，唔同部分香港人「直腸直肚」，有時係要思考下，先至會明佢哋真正意思，例如筆者以前讀大學、寫論文時對住啲英國教授，文章就算寫得唔好，佢哋係唔會同你講「too bad」（太糟），會好有技巧咁同你講「The idea is good, but ...」（不錯，但是...），重點就喺「但是」嗰度，依家英國政府對BNO計劃嘅意見，可能意思就係「我哋繼續支持計劃，你哋嘅意見我哋都聽到，但係改唔改，遲啲再打算」，英國人講嘢，有時未必會好明顯，不時都係「疑中留情」。
喺部分議員心目中，尤其係由港人聚區嘅選區，為移英港人發聲，其實亦係為咗選票，依家嘅英國反移民、反難民係一種大勢，可能部分英國人尤其係老一輩支持移英港人，但對於部分英國人嚟講，來自香港、烏克蘭或其他地方，分別未必好大，將來都有被針對嘅可能。筆者覺得重要，或者一個更加基本嘅因素，係英國當地嘅生活情況，依家英國等歐洲地方經濟差，治安更差，加上華人可能受歧視，唔少移英港人都返香港，當初有人因為所謂「政治原因」要離開，但香港愈來愈好，英國就完全相反，為啖氣，賭上自己同家人嘅生活、生計，真係值得？部分移英港人未必表面同意稀思路，但相信佢哋心底都有清晰答案。
收藏
取消收藏
分享
