【點新聞報道】移民下照顧父母成為難題，最近有一位已移民英國的新抱，在社交網站上大吐苦水，話老公是獨子，在港住公屋的老爺奶奶想跟埋去英國，最近日日致電追問幾時接他們過去。新抱擔心住屋問題，指無法負擔再租另一層樓或者買另一層樓，直言「壓力大到崩潰」！
該名移英新抱在社交平台threads發文，先自我介紹指自己是一對90後夫婦，移民英國3年，差不多30歲，現於倫敦租住1房單位，強調並非賣香港物業移民。目前兩人都有工作，但當地生活成本高經濟壓力大，「我同老公都打緊倫敦office工，家庭總收入稅前£140k，但我份工唔算太穩定，因為要交租同埋物價關係，經濟壓力大，算係hard mode生活緊，禮拜六日盡量唔出街，想儲多啲錢」。
樓主對未來有着憧憬，已作好計劃，包括「買倫敦好校區3 bed house、生bb(目標生2個)，以及買架平平地2手車」。然而，若老爺奶奶到來會造成沉重負擔，打亂一切計劃。
樓主表示老爺奶奶想隨兒子移民英國，「老公係獨仔，雙親仲係香港，佢哋想過嚟英國，最近日日打俾我老公問究竟幾時接佢哋過嚟」。樓主擔心住屋問題，認為「相見好同住難，一齊住實有磨擦」，然而又無法負擔另一住處的開支，「我哋實在無辦法負擔佢哋嚟到英國要租另一層樓或者買另一層樓」。
樓主提到老爺奶奶在香港住公屋、無收入，「老爺奶奶係香港住公屋，無任何收入，早係50歲已無做嘢，一直靠老公之前俾一筆錢係香港生活」。她說：「一直無同老公講出口，究竟50歲退休留係屋企玩電話係咩玩法！！！！ 一諗到呢點條氣就好唔順 」。
樓主直言壓力大到崩潰，「我哋都有自己目標，我就嚟壓力大到崩潰，我自問一分一毫無問過佢哋拎」。她明白老公唔想留兩老在香港，所以現時希望可以先延後，「我而家會提議我哋入咗籍先再諗佢哋，搞掂我哋自己先」。
有網民留言點出核心問題，指「其實個問題核心似乎係你同你老公目標都未一致，佢想做孝順仔，你就想喺倫敦生仔買車買樓，你哋傾好資源會點運用，應該prioritise咗邊樣嘢先」。
有網民就以過來人身分分享經歷，「我係過來人依家同兩件住仲要8 0幾歲話比你知頂咗兩年真係好辛苦，隔兩日就要去一次超市日日要煮飯比佢哋食去遠啲抖下氣都唔得最多3日咁大把，依家已經有一個話開始吞唔到嘢要用攪拌機打爛，所以你哋真係要諗清楚唔係日日家嘈屋閉！」。
收藏
取消收藏
分享
