文/稀思路
好多人話西方國家制度好、法治好，以至係警察都「好」，但所謂「好」其實有幾好？由近年針對罷工嘅拘捕行動、法庭「加快加速審訊」，其實筆者睇嚟，西方國家例如英國嘅警察，執法力度肯定比香港嘅「快、狠、準」。最近，綜合外媒報道，英國又再出現支持巴勒斯坦嘅遊行示威，結果有近900人被捕，當中大約有857人更被指涉違反《2000年反恐怖主義法》。一場反戰爭、反侵略嘅示威，參加者被指涉嫌違反「恐怖主義」相關法律，英國政府以至警方，會唔會過分咗少少？
根據報道，喺英國倫敦嘅當地時間6日，民眾又再舉行支持巴勒斯坦遊行示威，目的都係反戰、反滅絕，並聲援早前畀英國政府取締嘅「巴勒斯坦行動」，期間，警方同示威者起衝突，截至翌日，就拉咗近900人，筆者睇到有新聞指，英國警方話佢哋受到「極其嚴重嘅虐待、襲擊」，所以採取行動。
警方嘅說法，似乎睇唔同媒體報道嘅內容，所呈現嘅事實似乎「有出入」，因為亦有媒體指，警方其實喺活動開始後幾分鐘，就開始拘捕行動，包括強行拖走拒絕離開嘅示威者，而且喺過程當中，警方連老年示威者都推落地，即係連「老人家都打」；綜合唔同消息，英警喺示威開始就想清場，可能真係有示威者襲警，但係筆者睇，英警由「第一分鐘開始」，就無諗過畀呢場示威繼續落去。
成件事嘅起因，在於英國人反戰，反對以色列，亦係反對英國支持以色列，佢哋示威嘅目的係咪合乎公義，筆者相信讀者可以清晰判斷到；今次示威嘅重點，仲包括示威者聲援被英國取締嘅「巴勒斯坦行動」，所以英警作出拘捕行動時，係用「反恐」名義拘捕，如果罪成，係可以最高被判監14年。市民反戰、反對英國支援以色列，就可能涉嫌違反「反恐」法例，筆者想問下移英政客、反對派人士，佢哋係咪要出下聲，支援下被捕人士呢？
撇除所有政治、國際關係嘅立場，英國民眾其實就係想遊行、表達訴求，一開始幾分鐘就清場，如果話警方受襲，筆者估計，係示威一開始警方就想清場，於是同示威者起衝突，但英警如果連老人家都打，那些移英政客、反對派人士，成日吹捧外國嘅民主、政治環境等等，不如佢哋睜大眼睇清楚，英國示威一開始就清場，示威者唔係被指非法集會或未經批准集結，而係以「反恐」相關罪行被捕！
關於呢單新聞，筆者去睇羅冠聰、鄭文傑等人嘅社交媒體，佢哋應該人在英國，但就活在「平行時空」，對於英國嘅不公義現象，完全當睇唔到，仲喺度講中國「超級大使館」、莊梅岩等等，佢哋係唔敢批評英國政府，定係甘心淪為英奴？成日講正義，但去到外國就變啞，除咗係「反中」反上腦，仲可以講咩？喺香港，佢哋聲稱要追求公義，人在外國，就「乜都見唔到」，果然係「政客」！
收藏
取消收藏
分享
