文/稀思路
9月3日上午，紀念中國人民抗日戰爭暨世界反法西斯戰爭勝利80周年大會喺北京天安門廣場隆重舉行，呢場世紀閱兵，猶如世紀盛會，多國元首參與，中國、俄羅斯同朝鮮領導人歷史性同場，有分析指今次閱兵係重塑緊全球南方嘅秩序，連外媒都分析今次中國閱兵意味中國擴大影響力。喺太平洋另一邊，美國似乎就有啲坐立不安，特朗普更公開發表「酸溜溜」嘅言論，筆者感覺，特朗普嘅晦氣，可能係出於俄羅斯、朝鮮兩國連美國都唔太畀面，竟然齊齊去曬中國睇閱兵，「我特朗普顏面何存？」
正當中國舉行閱兵儀式時，太平洋另一邊嘅美國，官員都十分忙碌，根據中國自媒體「玉淵譚天」嘅微博發文，當時美國五角大樓附近嘅達美樂披薩店（Domino』s Pizza）和棒約翰披薩店（Papa Johns Pizza）突然流量激增，訂單可能係平時嘅4倍同3倍有多。由於當時正值中國閱兵活動舉行，以媒體對「五角大樓訂披薩」嘅理解，應該係五角大樓嘅官員、工作人員要加班觀察中國閱兵情況。
五角大樓嘅訂餐情況，或者可以間接佐證美國十分緊張中國閱兵情況，而美國總統特朗普嘅說話，似乎更加直接顯示特朗嗰種「為何不是我」嘅羨慕，喺自己社交媒體上，特朗普就發文「你們密謀反對美利堅合眾國的時候請代我向普京和金正恩致以我最熱烈的問候」，又表示自己睇中國閱兵覺得好驚艷，不過就「詫異」點解中國無提及抗戰時美國對中國嘅「幫助」。
二戰時美國有幾「幫」中國，筆者先唔討論，但筆者覺得，特朗普一副不是味兒嘅樣子，其實有好明顯嘅含意，首先係，特朗普一向都十分想俄羅斯以至朝鮮能更好地同美國合作，相比起對待盟友（美國狂加盟友關稅惹眾怒），筆者有時覺得特朗普對俄羅斯同朝鮮更客氣，但依家好明顯，俄羅斯以至朝鮮等國家，係更加畀面中國，呢一點特朗普應該好在意，所以先有一句「幫我問候普京同金正恩」。
另一層含意，可能對美國嚟講更加在意，就係中國嘅軍事發展，雖然綜合而言未必去到完全追趕或超越美國，但肯定係大有進步。有評論員就分析，中國殲-35設計概念係參考美國F-35，而超過美國F-35嘅動機在於，設計目標就係要以凸顯中國空戰性能；另外，鷹擊-19速度達八馬赫，簡單直接地講，一萬公里時速，製造難度高到不得了，係冇其他國家可以做到。中國所展現嘅，係陸、海、空「三位一體」嘅戰略力量，其他嘅仲包括無人機軍事裝備等等。
對於中國閱兵，坊間、媒體以至外國近日有好多分析，筆者覺得整個閱兵嘅重點，關鍵其實唔止係展示軍力，而係和平。強大嘅閱兵，稀思路話係為咗和平，有冇搞錯？絕對冇搞錯，依家世界唔和平，而中國過去幾十年一直和平，主因係過去幾十年中國喺黨中央領導下變得越來越強大，現代化嘅先進武器等，正正係保障中國和平、不被入侵嘅必要軍備。如果中國軍事實力、經濟能力仲係薄弱，特朗普仲唔對中國「撳住搶」？所以，中國抗日勝利閱兵儀式，一場世紀盛會，其實都係為咗和平，讀者們要好好記住，抗日戰爭嘅慘痛經歷，今日和平嘅來之不易。
收藏
取消收藏
分享
