文/稀思路
喺之前嘅文章，稀思路都講過唔少外國、移民嘅情況，包括港人移居到英國同加拿大等等，一個綜合嘅感覺，就係「移民會搞着自己」，可支配收入會減少、社交生活不如以前，最慘嘅係，移民會受到外國人歧視，甚至碰上暴力事件。最近，英國果浸反移民浪潮似乎愈來愈厲害，面對非法移民，英國本土人已經到咗視對方為威脅嘅程度；如果情況持續，而極右分子連合法移民都針對，港人以至其他國家嘅合法移民，會唔會好危險？
近日，喺倫敦附近嘅埃平市，就出現咗一股非一般嘅反移民示威，喺一間專用嚟畀難民住嘅酒店，就因為喺7月份，一名埃塞俄比亞尋求庇護者被控性侵一名14歲少女，引發起反移民情緒，當地居民同示威者過去幾日不斷喺酒店附近抗議，而且多次出現暴力場面。筆者睇新聞，英國當地反移民情緒高漲，甚至有人喺網上揚言，「我唔鍾意呢啲男人喺呢間酒店，因為我哋擔心孩子安危，如果咁代表我係極右，就咁啦！」
其實，自去年英國一名17歲本土出生但父母來自盧旺達嘅青年殺害3名兒童後，網上就出現大量假消息，謠傳疑犯係尋求庇護嘅穆斯林，引發英國多地示威。反移民聲浪一直壯大，英國部分政客亦有份推波助瀾，例如保守黨領袖巴德諾赫，就曾聲稱女性唔敢喺公園行路，因為怕會畀喺叢林入面嘅「男難民」騷擾；而英國極右改革黨領袖法拉奇，更加係直接呼籲民眾喺接待難民嘅酒店外示威。罪案或慘劇發生，然後社交媒體渲染，最後英國政客火上加油，可以肯定咁講，反移民、反難民事件有排都唔會完。
用一個較為客觀嘅角度睇，如果因為移民或難民佔據社會資源，有人有質疑意見，唔出奇，但筆者覺得，依家英國唔健康嘅風氣，係將移民或難民覺得係威脅或者死敵，甚至想將對方「置之死地」；喺去年青年殺害兒童慘劇後，就有遇害女孩之一嘅家人批評，極右勢力利用事件謀取政治利益。
成件事有遠因、有原因，更加有政治考量，喺太平時勢，非傳統政黨要喺唔同地方崛起都有困難，但依家喺英國嘅極右勢力，佢哋內心諗法只有佢哋自己知，但從言語、行動上睇，佢哋係利用緊反移民、反難民嘅議題，迅速喺英國政壇崛起；英國居民愈憎移民，佢哋就會得到更多支持。不過，如果呢種風氣持續，而難民又禁之不絕，其實係一個社會炸彈。
之前筆者都講過，當有啲移英港人選擇支持極右政黨，而又一齊反對難民政策時，其實睇真少少，英國極右勢力可能係反對「所有移民」，包括埋香港特區、烏克蘭等移民；一個合理推斷，係英國極右勢力一直發展，又一直激化，可能有一日會發展到連BNO「5+1」嘅香港移民都想趕走，而從英國政府政策亦可見，用BNO計劃嘅移英港人，可能會喺政策上被削弱權利。筆者覺得有一點好重要，就係任何地方生活，安全係最重要，最怕英國有日極右勢力失去理性，難民、移民同非英國人全部都針對，繼而出現更多暴力事件。
收藏
取消收藏
分享
