【點新聞報道】林家謙一連十場演唱會，每晚嘉賓都有驚喜，昨晚（8月30日）驚喜則是久未在台上演唱的張柏芝。張柏芝束了兩條長長的孖辮裝配上淺色紗裙，神采飛揚。當林家謙介紹柏芝出場，全場歡呼聲不絕。
兩人先是合唱《任何天氣》，繼而林家謙緊張笑道，「好癲呢件事，我醒未？（自己打自己一下）好開心，真係唔知點講，從何說起……你好耐冇出嚟見大家，包括我都非常興奮……」柏芝：「我好耐冇唱《任何天氣》，自己係新人18歲喺紅館嗰陣都唱過，我好緊張……」家謙叫工作人員拿出柏芝的CD，「你係我第一個買唱片嘅歌手，嗰隻碟叫《Destination》，之後《不一樣的我》……嘛，你可唔可以同我簽個名呀？」現場即起哄家謙再次自肥集郵。家謙再續道：「《不一樣的我》係我當年成日拎嚟做參賽歌曲㗎，嗰陣我重未轉聲，唱你個KEY，霎眼間，我就已經轉咗聲，好神奇呀呢件事。」
柏芝指家謙成個人似乎有一個好乖好純的光環咁，好有才華。當接到電話被邀請做嘉賓時，就想自己雖然出咗很多唱片，但好多人識嘅歌唔多，「我紅得一首歌……」家謙：「唔係囉，《一直掛念》，跟住《不一樣的我》《棉胎》 ，大家都識你好多歌……你講嘅嘢唔成立呀！」柏芝說：「有一首歌，係我新人時，好堅持要唱，唔係我自己嘅。公司打嚟話有機會喺紅館表演，我就想唱呢首歌，我希望每一分每一秒都珍惜身邊所有的東西，很多東西都不必然，我們應該要很活在當下和開心，珍惜所有自己愛的人，我選擇呢首歌，亦係很感恩地可以在紅館和大家一起唱，我都好開心嘅。呢首歌叫做《留給最愛的說話》可能很多後生仔唔係好識得，不過可能跟我差不多年紀嘅可能會識囉。」家謙：「我後生，我都識喎！」
兩人合唱《留給最愛的說話》時，讀白部分家謙突然改對白：「終於我鼓起咗最大嘅勇氣請你做嘉賓，因為我想面對住你講出我心裏面想講咗好耐嘅說話。可惜嗰個落雨嘅晚上，嗰條濕滑嘅公路，嗰個粗心大意嘅司機，令我差啲趕唔到嚟紅館，講一聲：多謝你。」觀眾聽到之後，不斷湧出笑聲，令柏芝更加緊張，直指自己聲都震了。
另外，昨晚360吊車上，家謙突然大癲開IG LIVE，同步給未能到場的歌迷一同歡樂，讓網上歌迷非常開心。
（點新聞特約記者陳惠芳報道）
收藏
取消收藏
分享
