【點新聞報道】林子祥（阿Lam）與葉蒨文（Sally）接受查小欣Youtube頻道專訪，阿Lam自曝早年留學英國，曾與弟弟被遺棄在地鐵站，更因冇錢交學費而被踢出校，阿Lam苦笑道：「做孤兒仔，冇嘢食！」而Sally原來竟不吃海鮮，理由相當離奇：「有一次朋友整龍蝦，我當場即喊！」
阿Lam提及這段畢生難忘的回憶：「細個喺英國冇嘢食，屋企人冇寄錢，學校踢咗我出嚟，爸爸雖然係醫生，不過佢由我哋（阿Lam與弟弟）自己去求生。所以乜都做，麥當勞、派報紙、幫人執屋、百貨公司，搵到幾多就食晒，冇㗎啦，因為仲要租房！」
而Sally則不吃海鮮，她說：「嗰陣時我Daddy煮蟹，丟隻蟹入個鑊，佢嘅眼睇住我好似叫救命，佢唔係叫，只係我自己諗，如果係我就會叫救命，但我救唔到佢，佢好慘！又有一次朋友整龍蝦，龍蝦仲郁，我當場即喊，我叫佢攞走，我唔得！」
Sally笑言兩夫婦對飲食並不講究，到快餐店就可以搞掂一餐，至於早前阿Lam被拍到在公園獨自吃燒味飯盒，看樣子十分孤清，阿Lam輕鬆回應：「不知幾enjoy，一啲都唔慘！我而家仲會去茶餐廳，飲奶茶、睇報紙！」
（點新聞特約記者陳惠芳報道）
收藏
取消收藏
分享
稿件由上傳 · 文責自負 · 不代表本網立場
