【點新聞報道】香港唱作歌手林家謙一連十場的《White Summer》演唱會昨晚（24日）來到第五場，演出嘉賓邀請到樂壇天后莫文蔚（Karen Mok），她更是特意從意大利飛返香港。這晚捧場有陳奕迅及容祖兒，還到後台為家謙打氣。
Karen出場時，林家謙難掩興奮之情，坦言「真係好多謝你，多謝你特登從意大利飛返來！」Karen則回應「我好開心，多謝你邀請我。上次我哋合作係五六年前，疫情個陣，所以今次你叫我，我點都要飛返嚟支持你。」
家謙在台上分享，Karen的音樂是他成長時期的重要養分，更透露童年時因哥哥經常於房間播放她的歌曲，甚至「半夢半醒都聽緊莫文蔚」。莫文蔚笑稱「唔怪得你音樂咁出色啦！」引來大片掌聲。
其後家謙更提到自己6歲時第一次見到Karen《全身莫文蔚》專輯封面非常好奇，他笑道，「個陣細個，會諗究竟係衫定係布？定係身體？細個未上堂，唔知係咩嚟嘅」隨即引發紅館爆炸笑聲，他更即場拿出實體碟展示，「其實我帶咗嚟，可唔可以俾大家睇？你會唔會尷尬？」引來全場歡呼大笑。Karen則大方回應「15歲以上可以睇㗎！你91年出世，隻碟係1996年出，咁細個點解會聽呢隻碟㗎，屋企又俾你買嘅？真係識貨。」又對着觀眾說，「裏面的歌，其實好正，係好嘢來，雖然你哋嗰陣可能未出世。」
家謙突然又笑道，「我諗住下隻碟都係咁影」再引爆歡呼聲及笑聲，Karen大笑道，「係咪㗎，我會買呀！」家謙說「你咁重口味，唔好啦！」拿着實體碟上台，當然就係求簽名，家謙即時請Karen於唱片上簽名，期間更緊張叫Karen「你唔好簽落個身體到」，笑到全場碌地。簽好之後，他更開心展示給大家睇，而歌迷就不斷呼叫，笑指他「自肥！」
其後，林家謙說，接下來要唱的是他童年時期的「洗腦歌」，即莫文蔚的經典作品《冷雨》。他透露因哥哥是DJ，家中播放這首歌「不下幾千次」，更稱其為「我家的至尊歌」。二人隨即合唱這首經典，完美和聲讓觀眾聽得如痴如醉。
（點新聞特約記者陳惠芳報道）
收藏
取消收藏
分享
