文/稀思路
筆者喺網上見到一單幾「有趣」嘅新聞，事緣英國尤其係倫敦鬧市罪案問題嚴重，其牛津街成為咗惡名昭彰嘅「搶手機魔地」，搶得有幾恐怖？據悉喺舊年，平均每15分鐘，就有一部手機被搶，即係平均每日有94單；為咗減低罪案，倫敦警察廳就出奇招，喺街道嘅特定行人路邊，畫下好搶眼嘅紫色標線，寫上「Mind the Grab」（注意搶劫），咁樣同喺地鐵「Mind the Gap」（注意間隙）係同一個道理，但係，警察唔係應該捉賊減低罪案先啱咩？
睇返報道，行動係由當地零售商、地方議會同倫敦警察一齊發起，旨在應對「過於頻密」嘅搶手機罪行，特別係賊人騎住單車、電單車喺行人路「一搶即走」，連當地嘅研究都顯示，接近九成民眾擔心喺市中心被搶劫或盜竊，筆者就覺得，倫敦呢個世界級都會，可以「正名」做搶劫之都啦！
增加標示有冇用？筆者唔可以話係冇，但根本要做嘅，其實係英國尤其係倫敦警察要捉多啲賊，然後再罰重啲，去阻嚇賊人犯案，如果畫下標示就可以減少罪案，或者期望問題「由此解決」，咁仲需要警察咩？仲有一樣嘢，因為英國監獄都開始人滿為患，好多小罪案根本唔會告到上法庭或者直接判監，咁偷竊、搶劫成本咁低，賊人係咪要「多謝」英國政府呢？
筆者最近仲喺網上面睇到一篇評論文章，意指英國很危險，香港很安全，文章就引述數據，英國截至2024年9月，英國警方喺英格蘭及威爾斯43個警區，一共記錄咗500萬宗非欺詐式罪案，當中暴力犯罪就有超過200萬宗，即係每1000人入面，就發生37宗多暴力犯罪，相同的數字對比，比例上香港少26倍。
有犯罪嘅風氣，就自然有犯罪的人，英國甚至美國等，雖然都係或者曾經係世上「最強國家」，但係依家嘅英美，明顯已經成為犯罪天堂，今次倫敦嘅「Mind the Grab」（注意搶劫），其實除咗係講緊英國尤其係倫敦嘅犯罪數字等，仲講明一件事，就係英國社會開始失序，所謂失序唔係無政府狀態，而係一個政府最基本嘅功能，即係保障民眾生命、財產安全都做唔到；當一啲國家連自己地方治安都顧唔掂，然後又去干預其他地方包括香港嘅法治，佢哋係咪用錯精力呢？
睇返過去一年嘅資料，例如係去年年底到今年，喺英國就出現過香港KOL喺倫敦嘅豪宅遭爆竊，據講失去大約1億港元嘅財物，為英國史上最大宗嘅屋盜竊案之一。之前睇新聞，香港有名人喺英國時被搶手機，直言「好唔鍾意倫敦」等等，筆者就覺得，有崇洋特色嘅人可以繼續美化英國等地方，可以同人講「外國生活有幾好」，但事實係咪咁，英國嘅罪案數字、英警行動已經說明一切，喺英國要「Mind the Grab」（注意搶劫），不如話如果有人想移民，要「注意英國」仲好啦！
收藏
取消收藏
分享
