【點新聞報道】鄭伊健日前帶同小師妹黃淑蔓（Feanna）到澳門舉行一場「ENCOUNTER WITH EKIN遇見鄭伊健美高梅音樂會」，以伊健的電影歌重新編曲，全新歌單，令人耳目一新。Feanna亦為伊健準備小驚喜，原定唱《戀愛預告》突然變成《動地驚天愛戀過》，伊健見慣大場面處變不驚，事後Feanna扁嘴：「點解你咁冷靜架？」讓伊健哭笑不得。
為了製造今次驚喜，一個月前Feanna與樂手瞞住伊健偷偷綵排。當伊健在台上聽到突然轉了歌呆了一下，但很快就回過神繼續揮手打拍子。完騷後經理人林珊珊問伊健為何如此冷靜？伊健：「我集中做嘢！做乜改歌唔話我知？（畀驚喜你嘛！）哈哈，不過真係好好聽，好用心演繹。」
伊健形容今次是「歌友會」，而非傳統形式演唱會，他說：「唱過好多次《友情歲月》 ，今次全新版本作為opening好特別，好有氣氛。」觀眾反應非常熱情，唱第二首歌《一起衝一起闖》就湧到舞台前爭相與伊健握手，又送上手幅為他打氣。
伊健連續又唱又跳多首快歌，伊健說：「都幾激架，主要係體能問題，一連串又唱又跳晒都幾甘，究竟我體能仲做唔做到呢？但我又好想做，因為我覺得呢個係熱情。我好想大家睇到呢個表演感受到熱情，然後將呢份感覺帶返屋企。」
過往伊健在台上較寡言，但這次音樂會卻像開籠雀，他解釋今次是音樂會形式似歌友會，而非過往有戲劇成份的演唱會，他說：「希望同觀眾close啲，我覺得依家大家好需要share。」音樂會尾聲，伊健誤將《TOGETHER》講成《至少還有我》，提早揭曉壓軸歌，出名好記性的他少有出錯，他哈哈大笑說：「年紀大機器壞，我記到咁多嘢已經好好架啦！」
有傳伊健將於日本舉行演唱會，他承認有好多想法但未落實，說：「好多憧憬、好多諗法，我依家成熟咗，未做好件事就唔講住。」
（點新聞特約記者陳惠芳報道）
收藏
取消收藏
分享
