
【點新聞報道】呂爵安(Edan)一連三場演唱會《EDAN LUI “e to E” LIVE 2025》昨晚尾場,Edan化身二登大師提到「人會變月會圓,無諗過MIRROR份約會完」,引來全場哄動,Edan即時補飛:「會續架嘛!會續架嘛!」

這晚跟Edan一齊「祓經」的,是昔日大學室友兼花劍「世一」蔡俊彥(Ryan)。為怕被話叨光,Edan特別澄清「我喺佢拎世界第一前已經請佢做嘉賓」,又解釋今次邀請嘉賓主要是身邊的人,Ryan即表示「尋日你話Anson Lo係你best friend喎,咁我係咩?」搞到Edan不知如何回答,最後才想出「你係我best buddy。」二人之後合唱周杰倫的《安靜》,而首次在公開場口獻唱的Ryan表現淡定之餘,其歌喉亦十分不錯。

除Ryan做嘉賓外,胞妹「小如豬」亦為Edan獻出第一次,兩兄妹合唱《漸漸我們》後,Edan笑言情緒勒索阿妹才答應,大爆妹妹超緊張,為演出節食減肥,又拉着他練歌排舞,他認真表示:「可以同阿妹一齊表演,達成咗人生一個小心願。」他恭喜大家能見證這時刻,「好感恩有呢個妹妹一直支持我,做我嘅心靈雞湯,俾情緒價值我,我都唔知點解可以有咁完美嘅妹妹,又靚又乖又孝順,跳舞又勁,第一次接Job,將啲錢分三份俾我同阿爸阿媽,我出道7年都未試過。」接着他即時公開搲撈,呼籲可找兩兄妹合作,然後一齊跳唱「妹豬歌」《三分甜》。

Edan事後受訪被問及女友林明禎有否捧場,他爽答有。
對於MakerVille前CEO魯庭暉離職,問到會否影響3年後之約,Edan表示:「又唔會,佢係我最尊敬嘅一個長輩,有咩難題都會想問佢,佢嘅離職對我嚟講有啲傷心,但都祝福佢,同埋唔代表我哋唔係朋友,私下可以約食飯。」談及新任CEO金廣誠,Edan指金生需努力改變自己,「要笑多啲,唔好咁嚴肅。」
(點新聞特約記者陳惠芳報道)


