文/稀思路
攬炒派政客潛逃海外，基本上都有一種特質，就係否認自己所犯嘅罪，將所有行為諉過於特區政府，支持、參與黑暴，係「冇錯」嘅；危害到國家安全，佢哋話「爭取民主」啫，千錯萬錯，自己一定冇錯！最近，人稱「癲鴿峯」嘅許智峯喺社交媒體表示，澳洲嘅內政部已經向佢批出庇護簽證（Protection visa），除咗佢本人，佢太太、兒女同父母，都以家屬身份同時獲批簽證，佢仲話有人「恭喜」佢時，佢心中難免戚然，因為自己係「政治難民」。坦白講，許智峯言過其實喇，因為根本上，佢係一個罪犯、通緝犯，而唔係政治難民！
就如其他攬炒派政客，許智峯當然唔會認自己有錯啦，喺佢社交媒體嘅文章中，字裏行間，完全流露出一種「錯不在我」嘅感覺，一邊感謝澳洲政府，一邊又有意無意地抹黑特區政府甚至中央，例如話自己「流亡不是移民」、「面對政治逼害」、「有家歸不得」；喺文章尾段，佢仲話日後就算澳洲同香港恢復引渡協議，因為佢已經有「庇護身份」，所以已經排除咗因為「政治理由」而有遣返佢嘅可能。
許智峯嘅語調，其實都係同之前差唔多，但筆者睇返過往嘅資料，包括佢涉嫌觸犯香港國安法，筆者都幾肯定，佢（以至其他潛逃政客）都唔係政治犯，喺一篇2020年年底嘅文章，當時嘅許智峯，已經涉及至少9條罪，包括喺所謂「光復屯門」行動，涉及搶人電話、不誠實使用電腦被控3罪；之前喺立法會涉犯藐視罪及干預、騷擾、抗拒或妨礙正在執行職責的立法會人員被控2罪；《國歌法》二三讀時踢嘢等被控4罪。連同香港國安法、其他藐視法庭罪，話許智峯「孭住十幾條罪」喺身，應該冇講得誇張。
在攬炒派政客而言，參與黑暴係一場「爭取民主」行動，但筆者要再次再次講清楚，黑暴運動係一場指向特區政府甚至中央，甚至想推倒特區政府嘅違法行動；喺黑暴過程，除咗打砸搶燒，部分人煽動「港獨」，有人要求外國制裁香港，亦有人甚至要外國一齊搞冚香港，許智峯當時係立法會議員，喺不同暴力場合都企到好前；而且，喺攬炒派嘅非法「初選」，許智峯亦係有參與，如果許智峯想否認一兩條罪，可能支持者會「信」，但十幾條罪都係「唔關佢事」？筆者對許智峯嘅反應，就係「哦」！
許智峯聲稱重視民主同自由，但筆者認為真正嘅民主，係唔會破壞，亦唔會以自由之名去影響其他人嘅自由，整場黑暴運動，就係破壞、破壞再破壞，過程中有人被磚頭掟死，亦有人被暴徒嚴重燒傷，筆者想問許智峯等人，「這是哪門的民主？」當攬炒派政客不斷指摘政府時，其實佢哋所做嘅，先係破壞香港，以及影響到其他人嘅自由同安全。
特別想提嘅一點，係許智峯話即使將來澳洲同香港恢復移交逃犯嘅協議，因為「佢係政治犯」所以唔會被遣返，筆者認為，如果講香港國安法，澳洲都有，國家安全法律唔係政治罪行；如果講其他法律，許智峯部分罪行除咗係普通法罪行，唔少普通法地方都有類似罪行，今日受庇護，唔一定代表將來係。許智峯有一點特別令人生厭，就係開口埋口都係講民主，但讀者們都可以反問佢一句，係咪因為佢聲稱自己「爭取民主」，就可以做乜都得先？
收藏
取消收藏
分享
